ՀՀ Ազգային ժողովի ՀՅԴ խմբակցության պատգամավոր Լիլիթ Գալստյանը նամակով դիմել է վարչապետ Տիգրան Սարգսյանին, որտեղ մասնավորապես ասված է. «Երևանի ճարտարապետական նկարագրի ու քաղաքաշինական խեղումների շուրջ մտահոգություններս բազմաթիվ առիթներով եմ արտահայտել, փաստել նաև, որ կիսում եք անհանգստությունս: Դեռևս  2008-ին Երևանի քաղաքաշինական ու բնապահպանական խնդիրներին նվիրված խորհրդարանական լսումներ կազմակերպեցինք: Թվում էր, թե համակողմանի քննարկումը կնպաստի քաղաքաշինական այնպիսի հայեցակարգի  որդեգրմանը, որի արժեքային ուղենիշները ուղղված կլինեն երևանցուն   և առհասարակ հասարկությանը: Ցավոք եզրակացություններն ու վերլուծությունները անպտուղ ու անհետևանք մնացին: Երևանի չկանոնակարգված, կետային կառուցապատումը շարունակվում է, նույնն է թե շարունակվում է Երևանի բետոնապատումն ու հանրային զբոսայգիների ոչնչացումը:  Քաղաքաշինության նախարարությունն էլ շարունակում է իր անդեմ կեցվածքը` անկարող  լինելով  անգամ բացահայտ ապօրինի մի կցակառույց ապամոնտաժել: Ինչպես նախկինում, այսօր էլ Երևանը, նախևառաջ, դիտվում է որպես բիզնես տարածք, ուր յուրաքանչյուր ազատ քառակուսին վերածվում է շինհրապարակի: Շահարկելով Թամանյանի անունը` շարունակում են  այլանդակել նրա քաղաքը: Օրինակները ցցուն են. 1.    Օրը ցերեկով խոշտանգվեց  Ուսանողական այգին: Հուսահատված երևանցիներն ու նրա մտավորական տարրն անկարող էին պայքարել նրա փրկության համար: Մի կողմից իբրև թե Վ, Համբարձումյանի 100 ամյակն ենք նշում, նախագահը հուշարձանի բացում է կատարում,  գիտելիքահեն ու մրցունակ Հայկական աշխարհ ենք կառուցում,  2012 թ Երևանը հայտարարում ենք համաշխարհային գրքի մայրաքաղաք և  Ազգային գրադարանից ընդամենը 4 մ հեռավորության վրա ոչնչացնում ենք ուսանողական զբոսայգին, կառուցվող երկու հսկայական ռեստորանների  արանքում նվաստացնում  Համբարձումյանի արձանն ու Թամանյանի հեղինակած աստղադիտարանը: 2.    Գլխավոր պողոտայի սկզբնամասում, Բյուզանդ-Սարյան գերկառուցապատ միջավայրում, այգու տարածքում հողահատկացում է կատարվել առևտրի կենտրոնի ու ստորգետնյա ավտոկայանետեղի կառուցապատման համար: 3.    Մի ցնցող քաղաքաշինական ծրագիր էլ վերջերս է բացահայտվել` Կոմիտասի այգում Դելֆինարիում է կառուցվում: Այս երեք պրոյեկտներն էլ իրականացվում են կանաչ տարածքների, հանրային զբոսայգիների տարածքում: Հարցեր և խնդիրներ.

• Ի՞նչ հիմնավորմամբ, ի՞նչ առաջնահերթությամբ, ի՞նչ էկոլոգիական փորձաքննության արդյունքում են կայացվել կառուցապատման տվյալ որոշումները:

• Ինչու՞ է խախտվել Քաղաքաշինության մասին ՀՀ օրենքը և վերոհիշյալ ծրագրերը հանրային քննարկումներ չեն անցել, ինչն օրենքի պահանջ է:

• Ռեստորանի, առևտրի կենտրոնի կամ  Դելֆինարիումի կառուցման հասարակական պահանջը ո՞վ է ձևակերպել, ինչու՞ հենց այգու ու շատրվանների տեղում:

• Ինչու՞ ենք հենց գերծանրաբեռնված կենտրոնում շարունակում կառուցապատումը, լրացուցիչ տրանսպորտային բեռի հեռանկարով,  երբ մայրաքաղաքի ծայրամասերը թերբեռնված են:

• Արդյո՞ք համապատասխանում է Ուսանողական այգու կառուցապատումը հաստատված շինարարկան թույլտվությանը:

• Որքանո՞վ է բարոյական, նաև ճարտարապետական էթիկայի առումով արդարացված Պանթեոնի հարևանությամբ Դելֆինարիումի կառուցումը:

• 2008-ից գործում է ՀՀ գլխավոր ճարտարապետի ինստիտուտը, այդ թվում նրա ղեկավարությամբ   քաղաքաշինական խորհուրդը:   Վերոհիշյալ ծրագրերից ոչ մեկը, այդ թվում Մոսկվա կինոթատրոնի ամառային դահլիճի հարցը  չի քննարկել խորհրդի կողմից: Արդյո՞ք բավարար հստակ են և սահմանված այդ ինստիտուտի (գլխավոր ճարտարապետի) գործառույթներն ու լիազորությունները, թե մայրաքաղաքը շարունակելու է քաղաքաշինական տեսչական հսկողությունից ու վերահսկողությունից, հանրային կարծիքից դուրս մնալ:

• Ինչու՞ շրջանառության մեջ չի դրվում «Քաղաքաշինական հսկողության և վերահսկողության մասին» կառավարության նախաձեռնած ՀՀ օրենքի նախագիծը, ինչի ընդունումն ու կիրարկումը թույլ կտա հնարավորինս վերահսկելի դարձնել մայրաքաղաքի քաղաքաշինական կամայականություններն ու պաշտպանված կենսամիջավայր ստեղծել նրա բնակիչների համար:

Հարգելի Պրն. Վարչապետ, Ակնկալում եմ նամակիս գրավոր պատասխան ստանալ, ինչպես նաև երեք կառույցների փաստաթղթային հիմնավորումները: Կանխահայտ շնորհակալությամբ` Լիլիթ Գալստյան