Մուտքն ԱԺ` միայն հրավիրատոմսով
Այսօր` վերանորոգումից հետո, վերաբացվում է Ազգային ժողովի նիստերի դահլիճը: Նոր լուծումներով օվալաձև դահլիճի շինարարության համար ծախսվել է 480 մլն դրամ: Դահլիճի բացման առիթով ԱԺ ղեկավարությունը հրավիրատոմսեր է ուղարկել խորհրդարանում հավատարմագրված լրատվամիջոցների խմբագիրներին:
Առավոտյան «Հետքը» զանգահարեց ԱԺ լրատվության բաժին, որտեղից պատասխանեցին, որ ԱԺ-ում հավատարմագրված լրագրողները խմբագիրների փոխարեն կարող են ներկա լինել դահլիճի բացման արարողությանը: Սակայն արդեն ԱԺ-ի ընդունարանում պարզվեց, որ առանց հրավիրատոմսի` լրագրողների մուտքը խստիվ արգելվում է:
«Դուք պետք է ձեզ հետ վերցնեիք գոնե ձեր խմբագրի անունով ուղարկված հրավիրատոմսը. առանց դրա` չեք կարող մտնել խորհրդարան»,- «Հետքին» ասաց ԱԺ-ի անցակետում հսկողություն իրականացնող լրատվության բաժնի աշխատակցուհին: Նա մի քանի օրաթերթերի լրագրողներին ևս նմանատիպ պատասխան էր տվել:
Նույն պահին ԱԺ եկավ հեռուստաընկերություններից մեկի լրագրողը, նրանից այդպես էլ հրավիրատոմս չպահանջեցին: Փաստորեն, արգելքը տարածվում է միայն էլեկտրոնային և տպագիր թերթերի վրա:
Եթե գտել եք վրիպակ, ապա այն կարող եք ուղարկել մեզ՝ ընտրելով վրիպակը և սեղմելով CTRL+Enter
Մեկնաբանել