Նախարարի եկամուտներն ավելացել են 45 անգամ
ՀՀ բնապահպանության նախարար Արամ Հարությունի դրամական եկամուտները 2009 թ. ավելացել են մոտ 45 անգամ` 2008-ի համեմատ: 2006 թ. Արամ Հարությունյանը (այն ժամանակ` քաղաքաշինության նախարար) որպես աշխատավարձ ստացել է 3 մլն 781 հազ 794 դրամ: 100 մլն դրամ էլ ստացել է Երեւանում գտնվող իրեն պատկանող հանգստյան գոտու մի մասի վաճառքից:
2008 թ. արդեն բնապահպանության նախարար Ա. Հարությունյանի եկամուտներն ավելի համեստ են: Այդ տարի նա հայտարարագրել է ընդամենը 2 մլն 906 հազ 178 դրամ, որը նրա աշխատավարձն է: Մեկ տարվա ընթացքում նախարարը 45 անգամ ավելացրել է դրամական եկամուտները` հասցնելով 131 մլն 61 հազ. 616 դրամի: Այդ եկամտի հաշվին բնապահպանության նախարարը 42 մլն դրամով Երեւանում գնել է մեկ բնակարան եւ ավտոտնակ: Արամ Հարությունյանը «Հետքին» բացատրեց, թե ինչպես է միանգամից հարստացել: Նախարարին են պատկանում մի շարք ձեռնարկություններ, որոնք եկամտաբեր են եղել 2009 թ.: «Եղվարդի ճանապարհաշինարարական ԲԲԸ-ն, որտեղ գլխավոր բաժնետերը ես եմ, 2009 թ. շահույթով է աշխատել»,- խոստովանում է Ա. Հարությունյանը: Նախարարն անկեղծացավ, որ Եղվարդի ճանապարհների շինարարությունը հիմնականում իր ընկերությունն է անում, սակայն ընդգծեց, որ տենդեր շահելու համար որեւէ միջամտություն չի արել. «Ես չեմ խառնվում, ոչ մեկը չգիտի, որ ես եմ փայատերը, որ գրեք, նոր կիմանան: Կառավարությունում էլ չգիտեն, այն ժամանակվա տրանսպորտի եւ կապի նախարար Գուրգեն Սարգսյանի ինչի՞ն էր պետք, որ իմանար` բաժնետե՞ր եմ, թե՞ չէ: Իմ ընկերությունն անցնում է բոլոր ընթացակարգերը եւ բոլոր ընկերությունների նման մասնակցում է մրցույթին»,- ավելացրեց Ա. Հարությունյանը: Նախարարի համար շահույթ են ապահովել նաեւ Դավիթ Անհաղթ փողոցում գտնվող «Նոր Ռեժանս» ռեստորանային համալիրը, որտեղ Ա. Հարությունյանն ունի 42 տոկոս բաժնեմաս, եւ դրա հարեւանությամբ գտնվող գազալցակայանը, որն ամբողջությամբ նախարարինն է: Նախարարն ասում է, որ «Հանարդնախագիծ» ԲԲԸ-ի բաժնեմասերի հիմնական փաթեթը նույնպես իրենն է, այն եւս 2009 թ. շահույթով է աշխատել: Նրան է պատկանում նաեւ Եղվարդի «Հայինկոմսպասարկում» ԲԲԸ-ի 70 տոկոս բաժնեմասը: Ընկերությունն այժմ օգտագործվում է որպես հեղուկ վառելանյութի պահեստ, որտեղ կարող է պահեստավորվել 4000 տոննա վառելանյութ: Եղվարդում Ա. Հարությունյանն ունի նաեւ 0.08 հա տնամերձ հողամաս եւ 0.43 հա վարելահող: Թեեւ մամուլը բազմիցս գրել է, որ Արամ Հարությունյանը Սեւանում հանգստյան գոտի ունի, սակայն նախարարը հերքում է այդ փաստը` ասելով, որ Սեւանը շատ է սիրում, նույնիսկ ձմռանն այնտեղ լողանում է, սակայն հանգստյան գոտի ձեռք բերելու ցանկություն հիմա էլ չունի: «Անձնապես չեմ գնա դրան, բայց եթե հնարավորություն լինի մեծ ներդրումային ծրագիր իրականացնել, ու դրան միանան այլ ներդրողներ, հնարավոր է, որ այդ շրջանակներում հանգստյան գոտու ծրագրեր իրականացնենք: Կարծում եմ` շատ լավ կլինի, որ մեծ ծրագրեր իրականացվեն, որովհետեւ Սեւանի ազգային պարկի տարածքն ուսումնասիրելով` գալիս ենք այն եզրակացության, որ փոքր ծրագրերը հագեցած են, անհրաժեշտ է խոշոր ներդրումներ անել, իմ կարծիքով` դրա անհրաժեշտությունն այսօր կա»,- ավելացնում է Արամ Հարությունյանը:
Մեկնաբանել