Տեսանյութեր
Լուսանկարներ
«Էսօր քեֆի օր ա»
ԱԺ նոր դահլիճի տեխնիկական խնդիրները զվարճացրել էին պատգամավորին
Այսօր ԱԺ վերանորոգված դահլիճում մեկնարկեց նիստերի քառօրյան: Հավանաբար լուսավոր դահլիճի իդեալական պայմանները ստիպել էին որոշ պատգամավորների ներկայանալ ԱԺ: Աշնանային նստաշրջանի այս քառօրյայի առաջին նիստին 106 պատգամավոր էր ներկայացել, մինչդեռ սովորաբար նրանց թիվը չի հասնում 96-ի:
Սակայն պատգամավորների զգալի մասը երկար չդիմացավ նաև բարեկեցիկ պայմաններին և օրակարգը հաստատելուց հետո ԱԺ նախագահ Հովիկ Աբրահամյանի գլխավորությամբ լքեց դահլիճը:
Այս նիստին էլ տեխնիկական խնդիրների պակաս չզգացվեց. պատգամավորների առջև դրված է մեկական մոնիտոր, և մի քանիսի մոնիտորներն այդպես էլ չաշխատեցին: ՕԵԿ-ական պատգամավոր Հեղինե Բիշարյանը տեղից դժգոհեց տեխնիկական խնդիրներից:
Երբ իրարանցում սկսվեց, պատգամավորներից մեկը բղավեց. «Էսօր քեֆի օր ա»: Քանի որ ԱԺ դահլիճում լրագրողների համար նախատեսված տեղեր չկան, լրագրողները խորհրդարանի աշխատանքները լուսաբանում են ԱԺ օթյակից, որտեղից պատգամավորների դեմքերը չեն երևում: Ուստի չտեսանք, թե որ պատգամավորն էր բղավողը: «Գիտեմ, որ ոգևորված եք, բայց զսպեք ձեր էմոցիաները»,- պատգամավորին դիտողություն արեց Հովիկ Աբրահամյանը:
Այսօր շքեղ դահլիճում հայտնվեցին նաև տարիներ առաջ շրջանառությունից հանված համարակալված բարձրախոսները: Պատճառը դարձյալ տեխնիկական էր. պատգամավորների անհատական բարձրախոսները չէին աշխատում:
Եթե գտել եք վրիպակ, ապա այն կարող եք ուղարկել մեզ՝ ընտրելով վրիպակը և սեղմելով CTRL+Enter
Մեկնաբանել