Հովիկ Աբրահամյան. «Դուք էլ մի ուզեք էլի աղայավարի ապրել»
Ազգային ժողովում այսօր ուշադրության կենտրոնում դարձյալ լրագրողներն էին: Դահլիճի վերանորոգումից հետո ԶԼՄ-ի աշխատանքը խորհրդարանում դարձել է գրեթե անհնար: Այդ առիթով լրագրողների սենյակ բարձրացավ ԱԺ նախագահ Հովիկ Աբրահամյանը: Նա հավաստիացրեց, որ առաջացած խնդիրները դիտավորյալ չեն արվել, թերությունները կշտկվեն, իսկ հաջորդ քառօրյայում լրագրողները դժգոհելու առիթ չեն ունենա:
Լրագրողներին հուզում էր օթյակի ապակիների լինել-չլինելու հարցը, ինչին Հ. Աբրահամյանը պատասխանեց, թե ապակիներով անվտանգության հարց է լուծվում: «Ես ոչ մի նպատակ չունեմ խոչընդոտել ձեր աշխատանքը, հակառակը` պատրաստ եմ ամեն ինչ անել, որ ձեր աշխատանքը լինի արդյունավետ: Ճիշտ է` լրագրողների մի մասը սուբյեկտիվ է գրում, բայց ես նրանց նկատմամբ վատ տրամադրված չեմ»,- ավելացրեց ԱԺ նախագահը:
Մինչ դահլիճի վերանորոգումը լրագրողներին թույլատրվում էր մուտք գործել դահլիճ` հետեւելու չորեքշաբթի օրը տեղի ունեցող Կառավարություն-ԱԺ հարց ու պատասխանին: Վերաբացված դահլիճում պարզվեց, որ լրագրողների համար առանձնացված տեղեր չկան, եւ դահլիճ մտնել չեն կարող: Լրագրողներին մտահոգում էր նաեւ պատգամավորներին «բռնացնելու» հարցը, քանի որ օթյակում գտնվող լրագրողներին հարմար չէ անմիջապես հասնել պատգամավորներին: Այս պահանջը Հովիկ Աբրահամյանը համարեց ճոխություն: «Դուք էլ մի ուզեք էլի աղայավարի ապրել: Դուք լրագրող եք, պիտի գնաք, հետեւեք: Ձեր համար հո չե՞նք կարող միջանցքները կարճացնել»,- ավելացրեց նա:
ԱԺ նախագահը ասաց նաեւ, թե լրագրողների համար ԱԺ-ում ստեղծված են առանց խոչընդոտի, աշխատանքային նորմալ պայմաններ: «Հետքը» Հ. Աբրահամյանից հետաքրքրվեց, թե արդյոք լրագրողների աշխատանքները խոչընդոտել չի նշանակում քառօրյաներից դուրս նրանց ազատ մուտքի արգելքը խորհրդարան: «Խոսում ենք 1999 թ. հոկտեմբերի 27-ի մասին, անվտանգության խնդիրներ գոյութուն ունի: Եթե պատգամավորի հետ հանդիպում է նշանակված, անցաթուղթ է իջեցնում, հանգիստ բարձրանում եք վերեւ, ի՞նչ խնդիր կա»,- պատասխանեց Հ. Աբրահամյանը: ԱԺ նախագահը կարծում է, որ խորհրդարանի անվտանգության կարգը հնարավոր է խախտեն նաեւ լրագրողները:
Նշենք, որ վերջերս «Հետքը» պատգամավոր Հեղինե Նաղդալյանի հետ հանդիպում ուներ, սակայն պատգամավորը տեղեկացրել էր, որ չի կարող անցաթուղթ իջեցնել, քանի որ «իր անցաթուղթ իջեցնելու լիմիտը սպառվել է»: «Անցաթուղթ իջեցնելու լիմիտ չկա,- ասաց Հովիկ Աբրահամյանն ու ավելացրեց,- հատուկ ձեզ համար ասում եմ, ես պատրաստ եմ ամեն ինչ անել, որ ձեր աշխատանքը արդյունավետ լինի»:
Եթե գտել եք վրիպակ, ապա այն կարող եք ուղարկել մեզ՝ ընտրելով վրիպակը և սեղմելով CTRL+Enter
Մեկնաբանել