Ավտոմեքենաների ժամանակավոր ներմուծումն արգելվելու է օրենքով
Այսօր Ազգային ժողովը քննարկեց Կառավարության ներկայացրած օրենսդրական նախաձեռնությունը` ֆիզիկական անձանց կողմից ավտոմեքենաների ժամանակավոր ներմուծումը վերացնելու վերաբերյալ: Կառավարության ներկայացուցիչ, Պետեկամուտների կոմիտեի նախագահի տեղակալ Արմեն Ալավերդյանը օրենսդրական փոփոխությունը պայմանավորեց նրանով, որ 2010թ. 9 ամսվա ընթացքում շուրջ 10.000 քաղաքացի ժամանակավոր ներմուծման ռեժիմով է ավտոմեքենաներ ներմուծել:
«Անհավասար վիճակ է ստեղծվում բոլոր այլ ներմուծողների նկատմամբ, ովքեր ներմուծում և վճարում են մաքսային վճարներ: Իսկ այդ 10 հազար քաղաքացիները, ձևակերպելով ժամանակավոր ներմուծում, իրենց վճարները հետաձգում են և տվյալ պահին վճարումներ չեն կատարում: Դրա հաշվին պետական բյուջեն կորուստներ է ունենում: Այդ գումարները շուրջ 12 միլիարդ դրամ կարող են կազմել, եթե այդ մեքենաների ներմուծումից քաղաքացիները հրաժարվեն: Պետք է ապահովվի հավասար դաշտ»,- ավելացրեց Արմեն Ալավերդյանը:
Ըստ նրա` բոլորն էլ գիտեն, որ ժամանակավոր ռեժիմով ներմուծված ավտոմեքենաներն ամենևին էլ «ժամանակավոր» չեն մնում Հայաստանում. դրանք ներմուծվում են և երկրում մնում մշտապես:
Արմեն Ալավերդյանը վերլուծություններ է արել ու պարզել, որ ժամանակավոր ներմուծման կարգից օգտվում են հատկապես թանկարժեք ավտոմեքենաներ ներկրողները, այսինքն` հենց մեծահարուստներն են խուսափում մաքսային վճարումներ կատարելուց:
Եթե գտել եք վրիպակ, ապա այն կարող եք ուղարկել մեզ՝ ընտրելով վրիպակը և սեղմելով CTRL+Enter
Մեկնաբանել