Հիմնականում Սերժ Սարգսյանի հետ մտերմության շնորհիվ օլիգարխ դարձած գործարար Բարսեղ Բեգլարյանը` Ֆլեշի Բարսեղը, հերթական անգամ հետաձգել է մեծ քաղաքականությամբ զբաղվելու իր ծրագիրը: Ինչպես հայտնի է, Բարսեղ Բեգլարյանը զբաղվում է ոչ միայն բենզինի ներկրմամբ, ժամանակ առ ժամանակ` ԳԹԿ-ով, այլև «Բարեպաշտ սերունդ» հիմնադրամի նախագահն է, որը մասնաճյուղեր ունի Հայաստանի տարբեր մարզերում: Ամռանը հայտնի դարձավ, որ «Բարեպաշտ սերունդը» հանդես է եկել նոր «Հանուն հայության հարատևման շարժում» նախաձեռնությամբ: Սակայն, որքան էլ Բարսեղ Բեգլարյանը քաղաքական պրոյեկտների նկրտումներ ունի, զգուշավոր է և չի ցանկանում որևէ կերպ վնասել իր բիզնեսին, ուստի շարժվում է բացառապես նախագահականի ուղենիշներով: