Վեհափառ Տեր, խոր վշտով մամուլից տեղեկացանք,որ ԱՄՆ Արեւելյան ափի Հեվենվիլ քաղաքի այրերը ցանկանում են վաճառել հայկական եկեղեցին, որի գնորդը պատրաստվում է եկեղեցու տեղում «Բուրգեր Քինգ» կառուցել: Հատկանշական է, որ հուշարձանների պահպանության քաղաքային հանձնաժողովը ցանկանում է պահպանել եկեղեցին: Հանձնաժողովի ներկայացուցիչները կարծում են, որ քաղաքի համար մեծ սխալ կլինի 163 տարվա պատմություն ունեցող եկեղեցին վաճառելը, հատկապես, որ նրա տեղում սննդի օբյեկտ է կառուցվելու: Հեվենվիլ քաղաքի հուշարձանների պահպանության հանձնաժողովի անդամ Քրիստիան Միլերի խոսքով, հայկական Սուրբ Գրիգոր Լուսավորիչ հայ առաքելական եկեղեցու տեղում ռեստորան կառուցելը չափազանց մեծ անհեթեթություն է: Հանձնաժողովը գտնում է, որ եկեղեցին քանդելը կփոխի քաղաքի դեմքը: Ինչպես նշում է Associated Press-ը, եկեղեցու սպասավորներն ասում են, թե հին շենքը վերանորոգելու համար 1,5 միլիոն դոլար է անհրաժեշտ, եւ նրանք ստիպված վաճառում են այն ավարտելու համար նոր եկեղեցու շինարարությունը: Այսօր, ցավոք, Աստծո գրեթե երկդարյա տաճարը, ազգապահպան այդ կառույցը գտնվում է ոչնչացման լրջագույն սպառնալիքի տակ: Հայ առաքելական սուրբ եկեղեցին, հանդիսանալով հայ ժողովրդի հավաքական ուժի խորհրդանիշը, մշտապես լծված լինելով աշխարհասփյուռ հայության պահպանման, զորացման, չուծացման ազգանվեր գործին, չի կարող ձեռք չմեկնել իր հետևորդներին` վերականգնելու,  պահելու, պահպանելու համար հեռավոր Հեվենվիլում ազգապահպան կարևոր նշանակություն ունեցող հայկական քրիստոնեական ևս մեկ բացառիկ արժեք: Ականջալուր եղեք, օգնեք մեր ազգակիցներին: Հայրենասեր Երիտասարդների Միություն