Կապանում գործող 10 հասարակական կազմակերպություն, հիմք ընդունելով մարդու կյանքի եւ առողջության հիմնարար իրավունքները, ստորագրահավաքի ընթացիկ արդյունքները, հանրության մեջ տիրող լարված մթնոլորտը, միասնական բաց նամակով դիմել են հանրապետության նախագահ Սերժ Սարգսյանին: Նրանք կոչ են անում չեղյալ հայտարարել Սյունիքում ուրանի ծրագրի իրականացումը և ընդունված իրավական ակտերը: Այս օրերին տեղում ստեղծված աշխատանքնային խումբը դեռ շարունակում է իր ակտիվ գործունեությունը նոյեմբերի 11-ին` ժամը 17-ին կայանալիք խաղաղ ցույցի կազմակերպման ուղղությամբ: Նախապատրաստական բոլոր աշխատանքները գրեթե ավարտել են: Աշխատանքային խումբը հերքում է վերջին օրերին տարածված այն տեղեկատվությունը, թե իբրեւ հանրահավաքը խափանելու նպատակով խմբի անդամների վրա ճնշումներ են գործադրվում: «Մեզ վրա ճնշումներ այս ընթացքում ընդհանրապես չեն եղել, եւ մեր գործունեության ժամանակ խոչընդոտներ չեն առաջացել: Նույնիսկ եթե հետագայում ճնշումներ փորձեն գործադրել, մենք, միեւնույն է. շարունակելու ենք մեր պայքարը, որովհետեւ մենք ոչ մեկից չենք վախենում»,- աշխատանքային խմբի անունից «Հետքին» տեղեկացնում է Կապանի «Ազատամարտ» կոմիտեի նախագահ Խորեն Հարությունյանը: Նա նաև հերքում է այս օրերի ընթացքում իր անվան հետ կապված այն տարածված լուրերը` իբրեւ իրեն այս ընթացքում ձերբակալել են` հայտարարելով, որ դա կեղծիք է, եւ  նման բան տեղի չի ունեցել: Մերի Սողոմոնյան