Գայ գյուղի բնակիչները մոտ մեկ ժամ շարունակ Արմավիրի մարզպետ Աշոտ Ղահրամանյանի հետ քննարկել են գյուղի 3 հա խաղողի այգիներում հայտնաբերված ֆիլոքսերիա հիվանդության հարցը: Հիվանդության պատճառով Կառավարությունը որոշել է այրել խաղողի այգիները` 1 հա-ի դիմաց գյուղացիներին հատուցելով 350 հազար դրամ: Մինչ հանդիպումը գյուղացիներն ասում էին, որ եթե մարզպետն իրենց խնդրին դրական լուծում չտա, իրենք կգնան Երևան` Կառավարության շենքի մոտ, և հանդիպում կպահանջեն վարչապետից: «Մարզպետի հետ քննարկումից հետո որոշվեց, որ վաղը գյուղնախարարության բույսերի կարանտինի և երկրագործության պետական տեսչության մասնագետներ նորից գան և ստուգումներ անեն մեր այգիներում: Այս պահին Կառավարության շենքի մոտ չենք գա, բայց եթե ստուգումից հետո նորից պնդեն, որ պետք է այգիները քանդվեն, ամբողջ գյուղով գալու ենք Երևան»,- «Հետքին» տեղեկացրեց Գայ գյուղի բնակիչ Հովհաննես Խաչիկյանը: Այս հարցում չեզոք դիրք է բռնել Գայի գյուղապետ Սեյրան Մարկոսյանը: Մեր տեղեկություններով` գյուղապետին հորդորել են չսատարել գյուղացիների բողոքի ակցիաներին և ամեն ինչ անել, որ վերջիններս համաձայնվեն Կառավարության առաջարկին: