Տեսանյութեր
Լուսանկարներ
Հին լուսանկարների հետքերով
Նոյեմբերի 11-ին Հայոց ցեղասպանության թանգարան-ինստիտուտում հանրային ելույթով հանդես կգա Մերձավոր Արևելքում «Սիլիկոն վելի գրուպի» ներկայացուցիչ Միսաք Քելեշյանը` ներկայացնելու տարիների ընթացքում իր նախաձեռնությամբ տարբեր աղբյուրներից հավաքված լուսանկարային և տեսաժապավենային նյութերը: Նյութերում արտացոլված է Մեծ եղեռնից հետո Հունաստանում, Կիպրոսում, Լիբանանում, Երուսաղեմում, Եգիպտոսում և Հայաստանում ամերիկյան «Մերձավոր Արևելքի նպաստամատույց» կազմակերպության որբախնամ գործունեությունը:
Հեղինակը բազում պրպտումներից հետո բացահայտել է Անթուրայում երիտթուրքերի ստեղծած պետական որբանոցում հայ որբերի թրքացման քաղաքականությանն առնչվող հետաքրքիր դրվագներ: Ուշագրավ է նաև Լիբանանի Ղազիրի որբանոցում հայ սաների պատրաստած և ԱՄՆ նախագահին նվիրաբերած գորգի պատմությունը:
Միսակ Քելեշյանը, համադրելով բազմաթիվ լուսանկարներում և տեսանյութերում արձանագրված պատկերները, ուշագրավ բացահայտումներ է արել նաև Բեյրութի հայ փախստականների ճամբարների պատմության վերաբերյալ:
Հեղինակի կողմից ներկայացվող որոշ լուսանկարներ, որոնք անդրադառնում են Մեծ եղեռնին և հայ որբերին, ներկայացվելու են առաջին անգամ:
Միսաք Քելեշյանը ինժեներ-էլեկտրիկի մասնագիտություն է ստացել Անգլիայում և արդեն 11 տարի է, ապրում և աշխատում է Ուոթերթաունում:
Եթե գտել եք վրիպակ, ապա այն կարող եք ուղարկել մեզ՝ ընտրելով վրիպակը և սեղմելով CTRL+Enter
Մեկնաբանել