Այսօր Ազգային ժողովի ՕԵԿ խմբակցության ղեկավար Հեղինե Բիշարյանը պատասխանեց լրագրողների հերցերին:

Տիկին Բիշարյան, հնարավո՞ր է, որ Հանրապետականի հետ միասնական ցուցակով մասնակցեք խորհրդարանական ընտրություններին` հաշվի առնելով այն, որ նախագահական ընտրություններին պաշտպանելու եք Սերժ Սարգսյանի թեկնածությունը:

Քանի որ «Օրինաց երկիր» կուսակցությունը շատ կազմակերպված քաղաքական ուժ է,

ունի, ունեցել է և ունենալու է իր ծանրակշիռ դերն ու նշանակությունը քաղաքական կյանքում, մենք գնալու ենք միայնակ, և կարծում եմ, որ մեր ծանրակշիռ տեղը կունենանք: Արդեն 20 տարեկան անկախ Հայաստանի պատմության մեջ «Օրինաց երկիր» կուսակցությունը 13 տարի մասնակցում է քաղաքական ընտրություններին. և խորհրդարանական ընտրություններին է մշտապես մասնակցել, և առիթ է եղել նաև մասնակցելու նախագահական ընտրություններին: «Օրինաց երկիր» կուսակցությունը մշտապես միայնակ է մասնակցել ընտրություններին և էլի այդպես է մասնակցելու ընտրություններին:

Նախագահական ընտրություններում առանձին թեկնածու չե՞ք առաջադրի:

«Օրինաց երկիր» կուսակցությունը իր նախագահի թեկնածուն ունեցել է, և մենք մասնակցել ենք նախագահական ընտրություններին: Բայց քանի որ 2008 թ.-ից հետո մենք ունենք պայմանավորվածություններ` համագործակցելու և միասին աշխատելու գործող նախագահ Սերժ Սարգսյանի հետ, բնականաբար, մենք արդեն ասել ենք, որ 2013 թ. մենք կպաշտպանենք նախագահ Սերժ Սարգսյանի թեկնածությունը:

Տիկին Բիշարյան, «Բարգավաճ Հայաստանը» հայտարարում է, որ ձգտելու է մեծամասնություն ստանալ առաջիկա խորհրդարանական ընտրություններում, և այդ դեպքում նաև հնարավոր է, որ առաջադրի Գագիկ Ծառուկյանի թեկնածությունը: Անկախ այդ պայմանավորվածությունից` ինչո՞ւ եք հիմիկվանից շարունակ հայտարարում, որ սատարելու եք Սերժ Սարգսյանին, և արդյոք չե՞ք սատարի Գագիկ Ծառուկյանին:

Դուք հարցնում եք, մենք պատախանում ենք: Այ¸ եթե Ձեր գործընկերոջ հարցը չլիներ, թե «դուք 2013-ին ո՞ւմ թեկնածությունն եք պաշտպանելու», մենք այդ մասին չէինք խոսի: Բացի դրանից` մենք արդեն ասել ենք մեր թեկնածուի մասին, և այլ մեկնաբանություններ չեմ ուզում անել, որովհետև բոլոր քաղաքական ուժերը, մանավանդ քաղաքական ուժի ղեկավար է խոսել 50+1-ի և թեկնածության մասին: Դա իրենց գործն է, իրենց խնդիրն է, իրենց որոշումն է:

Սերժ Սարգսյանին կսատարեք նույնիսկ այն դեպքում, եթե «Բարգավաճ Հայաստանը» ստանա մեծամասնություն, իսկ Հանրապետականը` փոքրամասնությո՞ւն:

Եկեք «նույնիսկ»-ներով, կարծիքներով և գուշակումներով չգնանանք առաջ: Մենք ռեալ մարդիկ ենք, ռեալ պատկերացում ունենք ամեն ինչի մասին, և կգա ժամանակը, և այդ ամենը պարզ կլինի:

2008 թ. նախագահական ընտրություններից հետո ՕԵԿ-ն այն քաղաքական ուժերից էր, որը նույնպես հայտարարեց ընտրությունների կեղծված լինելու մասին: Եթե 2012-ին խորհրդարանական ընտրությունները կեղծվեն, այդ դեպքում նույնպե՞ս ՕԵԿ-ը կսատարի Սերժ Սարգսյանի թեկնածությունը:

Ընտրություններին ընդհանուր առմամբ 13 տարի մասնակից եմ, և ընտրությունների կեղծիքների ցուցանիշը գնալով պակասում է: Հետո մենք Ընտրական օրենսգրքում ենք այսօր փոփոխություն անում, ընտրական հանձնաժողովներում ավելի պրոֆեսիոնալ խմբեր ենք ձևավորում, որոնք պետք է նպաստեն, որ այդ ընտրակեղծիքները բացառվեն: Չկա մի երկիր, և չեմ բացառում, որ կեղծիքներ լինում են, բայց դրանց տոկոսները պետք է գնալով նվազեն, ի վերջո հասնեն այնպիսի վիճակի, որ առանց կեղծիքների ընտրվի այն մարդը, որին ժողովուրդը ուզում է: Այդ ընտրակեղծիքների ցուցանիշը շատ արագ այդպես չի վերանա, բայց ես կարծում եմ, որ կնվազի: Այո, մենք 2008-ին դիմել ենք, և այդ հայտարարությունը ես ինքս եմ արել, բայց մեր դիմած ընտրատեղամասերը բացվել են, և կեծիքների ցուցանիշը եղել է ոչ շոշափելի, այսինքն` տեխնիկական որոշակի բաներ են եղել, որոնց արդյունքում մենք չշարունակեցինք այդ բողոքի ակիցան:

Իսկ եթե հիմա կեղծիքները լինեն շոշափելի…

Ես չեմ կարծում, որ գնալով ավելի շոշափելի կլինեն: Ընդհակառակը` ես մտածում եմ` գնալով պետք է պակասեն ընտրակեղծիքները:

Տիկին Բիշարյան, եթե Դուք արդեն հայտարարում եք, որ 2013 թ. սատարելու եք Սերժ Սարգսյանին, նշանակում է, որ բնականաբար, ընդդիմություն չեք լինելու, այլ լինելու եք իշխանություն, հնարավոր է, որ նաև կոալիցիա ստեղծեք անհրաժեշտության դեպքում: Կարո՞ղ եք ասել` ինչի՞ց դրդված 2012-ին ընտրողը պետք է ՕԵԿ-ին ձայն տա: Դրա փոխարեն կգնա ՀՀԿ-ին կընտրի ու կվերջացնի: ՕԵԿ-ին ձայն տալու իմաստը ո՞րն է:

Ո՞ր առումով իմաստը որն է:

Այսինքն` ինչո՞ւ, ինչի՞ց շահագրգռված պետք է ընտրողն ՕԵԿ-ին ձայն տա: Կգնա ՀՀԿ-ին ձայն կտա:

Իսկ ինչո՞ւ պետք է մյուսներին տան, ՕԵԿ-ին չտան: Դուք նորից տանում եք «եթե»-ներին: Ես «եթե»-ներին չեմ ուզում պատասխանել: Դուք հարցնում եք, մենք պատասխանում եք Ձեր հարցին այդ «եթե»-ների մոտավոր շրջանակներում: Դուք ուշադիր եղե՞լ եք, որ նախկին իշխանական ուժերը այսօր ընդդիմություն են, և նորից ուզում են գնալ ամեն ինչի գնով իշխանություն վերցնելու: Բոլոր քաղաքական ուժերն էլ հրաժարականներ են տալիս, գնում են ընդդիմություն, նորից վերադառնում են իշխանություն և այլն: «Օրինաց երկիր» կուսակցությունն անցել է այդպիսի ճանապարհ: Մենք այլևս այդպիսի մտադրություն չունենք: Մենք իշխանության մաս կազմած քաղաքական ուժ ենք, որը ավելացրել է մեր պարտականությունն ու պատասխանատվությունը մեր ընտրողների առջև: Մենք գնացել ենք իշխանություն` կատարելու մեր ծրագրերը, մեր դրույթները, որոնք խոստացել ենք մեր ընտրողներին, աջակցելու, որ նրանց կյանքում բան փոխվի: Եվ մենք այս ճանապարհով գնալու ենք:

Տիկին Բիշարյան, մինչ բոլոր քաղաքական ուժերը, այդ թվում ՕԵԿ-ը պատրաստվում են հերթական խորհրդարանական ընտրությունների, ՀԱԿ-ը հայտարարում է, որ գնում է արտահերթ ընտրությունների: Տեսնո՞ւմ եք նման հեռանկար:

Ոչ, ես արտահերթ որևէ բան չեմ տեսնում: Գուցե այնքանով, որքան իմ քաղաքական կենսագրությունն է թույլ տալիս հասկանալու քաղաքական իրավիճակը, այն, թե քաղաքական դաշտում ինչ է տեղի ունենում, ես բացարձակապես չեմ տեսնում ոչ մի արտահերթ ընտրություն:

Հաշվի առնելով, որ 2008 թ. ընտրություններից հետո ՕԵԿ-ի վարկանիշը համեմատաբար ընկել է, ինչի ապացույցը ավագանու ընտրություններն են, ի՞նչ եք կարծում` այս խորհրդարանական ընտրություններին ձեզ կհաջողվի՞ անհրաժեշտ շեմը հաղթահարել:

«Օրինաց երկիր» կուսակցության վարկանիշի անկումը կապված է սև PR-ի հետ:

Ո՞վ է արել սև PR-ը:

Բոլորիդ հայտնի է: Որքան ժամանակները հեռանում են (իսկ ժամանակն է ընդհանրապես տալիս ճիշտ գնահատականը), բոլորին հայտնի է դառնում, և ավելի շատ մարդիկ և լուրջ մտավորականներ են այսօր գնահատում ՕԵԿ-ի քայլը: Երևան քաղաքի ընտրությունները դժվարություն էր ՕԵԿ-ի համար զուտ այն առումով, որ անընդմեջ մասնակցում էինք 3 ընտրությունների` խորհրդարանական, նախագահական և քաղաքային: Մենք ունենք նաև լուրջ կազմակերպչական խնդիր, թեպետ սև PR-ի և կազմակերպչական թերությունների արդյունքում արդեն իսկ քաղաքի ընտրություններին խորհրդարանական ընտրությունների այդ տոսկոսի չափը մենք հաղթահարել ենք: Այնպես որ, առավել ևս նրա արդյունքում, որ մենք հետևություն ենք արել առաջին հերթին այն թերությունների, ունեցած խնդիրներ շուրջ, և ՕԵԿ-ը ավելի կազմակերպված և ավելի լուրջ այսօր աշխատում է ողջ երկրով մեկ, ես վստահ եմ, որ ունենալու է իր ծանրակշիռ դերը:

Բոլորը տոկոսներ են հայտարարում: Քանի՞ տոկոս ՕԵԿ-ը կհավաքի:

Ես չեմ սիրում գուշակություններով, թվային լեզվով խոսել: Քաղաքական բոլոր ուժերը աշխատում են, իրենց նախընտրական ծրագրերի, օրենսդրական գործունեության շրջանակներում: Իրենց կատարած աշխատանքների արդյունքում գնահատականը տալիս է ժողովուրդը: Մարդիկ վաղը որքան ձայն կտան, այնքան էլ կունենա «Օրինաց երկիրը», և ընդհանրապես բոլոր քաղաքական ուժերին որքան ձայն կտա ժողովուրդը, այնքան էլ նրանք կունենան տոկոսներ: Այսօր դեռ վաղ է այդ մասին խոսել և ցուցանիշներ ասել: Բայց որ «Օրինաց երկիր» կուսակցությունը կհայտնվի խորհրդարանում և կունենա իր ծանրակշիռ տեղը, ես վստահ եմ:

Արդյոք ՕԵԿ-ը կտրականապես բացառո՞ւմ է որևէ համագործակցություն Լևոն Տեր-Պետրոսյանի և նրա ղեկավարած Հայ ազգային կոնգրեսի հետ, թե՞ հնարավոր է, որ ինչ-որ փուլում, ասենք թեկուզ ընտրությունների կեղծման պարագայում նորից ՕԵԿ-ը ինչ-որ համագործակցության եզրեր փնտրի քաղաքական այլ դաշինքի հետ:

ՕԵԿ-ը իշխանության մեջ է, որպեսզի կարողանա հետևողականության ցուցաբերել, որ կեղծիքներ չլինեն երկրում, որ թերությունները վերանան, որպեսզի աշխատանքներն այնպես կատավեն, որ դժգոհությունները երկրում ավելի քիչ լինեն: Այսօր խորհրդարանում ՕԵԿ-ը համագործակցում է 2 ընդդիմադիր քաղաքական ուժերի` «Ժառանգության» և Դաշնակցության հետ տարբեր խնդիրների շուրջ: Որևէ բան չի բացառվում: Ես վստահ եմ, որ ընտրությունների արդյունքում ՀԱԿ-ը նույնպես իր տեղն ու դերը կունենա խորհրդարանում. եթե կլինեն հարցեր, մենք կհամագործակցենք:

Որտեղի՞ց է Ձեր համոզմունքը, որ ՀԱԿ-ը ներկայացված կլինի հաջորդ խորհրդարանում:

Դե, իրենք էլ քաղաքական ուժ են և բավականին պայքար են մղում, և իրենք էլ կարծեմ բավականին նաև կառուցողական էլ են խոսում, և իրենք էլ այդ բոլոր հնարավորությունները ունեն կազմակերպված ընտրություններ անցկացնելու արդյունքում հայտնվել խորհրդարանում: Ես կարծում եմ, որ իրենք էլ կլինեն:

Դուք ասացիք, որ ՀԱԿ-ը կառուցողական է: Որտե՞ղ եք տեսնում այդ կառուցողականությունը:

Ասացի` որոշակի հարցերում: Իրենց անդամներից հաճախ մեկնաբանում են տնտեսական հարցեր, որ եթե էսպես անեն, էսպես կլինի: Ես զուտ այդ տեսանկյունով եմ ասում: Չեմ ասում` իրենց ողջ գործունեությունը, ի սեր Աստծու:

Տիկին Բիշարյան, երեկ մամուլում հրապարակում կար, որ մասնավորապես Արթիկի շրջանում ՕԵԿ-ը անցել է ժողովրդի կուսակցականացման գործընթացի, և միլպետն է այդ գործընթացում խառնված:

Ես անհեթեթ եմ համարում նման մոտեցումը: Բոլորիդ է հայտնի, որ և կուսակցության նախագահի ծնողների, և իմ, և Հովհաննես Մարգարյանի, և Արծրունի Աղաջանյանի արմատները Արթիկից են: Մեր հարազատներն ու բարեկամները մեծ մասամբ ապրում են այդ տարածաշրջանում: Բացի դրանից` ՕԵԿ-ը միշտ ակտիվ է եղել այդ տարածաշրջանում, ՕԵԿ-ի ընտրությունների ցուցանիշները միշտ բարձր են եղել: Եթե այդտեղ մենք ունենք պատգամավորներ, քաղաքական լուրջ թիմեր, որոնք մշտապես կայուն ընտրազանգված են, կայուն քաղաքական թիմեր են, դա չի նշանակում, որ պետք է շահարկել:

Բարեկամների թիվն ընդլայնվո՞ւմ է:

Ես ասացի` նաև բարեկամներ, նաև չբացառեցի այդ տարբերակը: Բայց մեր քաղաքական թիմը այնտեղ շատ կայացած է, մենք ունենք գրասենյակներ, կառույցներ, և մեր կառույցները շատ կուռ են ընդհանրապես Շիրակի մարզում, ոչ միայն Արթիկում:

Նշվում է, որ բռնի կերպով են օեկականացնում:

Ինչպե՞ս, ո՞րն է այդ բռնությունը:

Պետրոս Մակեյանը ասել է, որ բռնի կերպով են անում:

Ես ամեն մեկի մեկնաբանությունը չեմ ուզում մեկնաբանել: Ես ասացի այն, ինչ ճշմարտությունն էր:

Տիկին Բիշարյան, Դուք խոսեցիք ՕԵԿ-ի կազմակերպվածության և կուռ լինելու մասին: ՕԵԿ-ը ինչո՞վ է ապահովագրված, որ չի կրկնվի այն սցենարը, որը տեղի ունեցավ մի քանի տարի առաջ. այն է` երբ սրվեցին հարաբերությունները իշխանության հետ, շատ մարդիկ, ուղղակի պատգամավորներ լքեցին ՕԵԿ-ը, զորօրինակ` Սամվել Բալասանյանը և այլն: Հիմա Դուք համոզվա՞ծ եք, որ նման ցնցումների դեպքում ՕԵԿ-ը նման փորձության չի ենթարկվի:

Ձեր հարցը կարող եք ուղղել այլ քաղաքական ուժերի: ՕԵԿ-ը ցնցումների ճանապարհով անցած քաղաքական ուժ է, և բոլորին ապացուցել է, որ ինքը ցնցումներից որևէ բանի չի ենթարկվում, ամուր է, կուռ է և կայացած: Իսկ ցանկացած քաղաքական ուժի հետ, եթե լինեն ցնցումներ, բնականաբար, նույն երևույթը կկատարվի:

Իր վերջին ասուլիսներից մեկում Ռաֆիկ Պետրոսյանը նշեց, որ Հանրապետական կուսակցությունը զբաղված է կոալիցիայի ներսում մասնավորապես ՕԵԿ-ի հզորացմամբ:

Ես չեմ կարծում, որ Ռաֆիկ Պետրոսյանը էդպիսի բան է ասել, որովհետև ես հետևում եմ մամուլին, էլեկտրոնային բոլոր կայքերին, և նման արտահայտություն որևէ տեղ չեմ կարդացել: ՕԵԿ-ը ինքը այնքան ներուժ ունի, որ հույսն ինքն իր վրա է դրել, և ինքն իր ուժերով աշխատում է, հզորանում է և համալրում է իր շարքերը և գնում է առաջ: 13 տարվա մեր պատմությունը այդ մասին խոսում է: Ընդհանրապես ամեն քաղաքական ուժ ինքն է ուժեղանում, ինքն է ամրացնում իր շարքերը և ինքն է և թույլի, և ուժեղի պատասխանատուն:

ՀԱԿ-ի գլխավոր պահանջը քաղբանտարկյալների ազատ արձակումն է: Հանրապետականները նշում են, որ անազատության մեջ գտնվողները քրեական հանցագործներ են: Ո՞րն է ՕԵԿ-ի կարծիքը:

Ես, ճիշտն ասած, ոչ դատավոր եմ, ոչ դատախազ եմ: Համապատասխան մարմինները պետք է ասեն` ով ինչքանով է մեղավոր, և ինչպիսի մեղքի բաժին ունեն պատժվածները: Իրենք պետք է մեկնաբանեն: Եթե ունեն հիմքեր` դատելու մարդուն, առանց հիմքերի հո չի՞ լինում: Էստեղ ես չեմ կարող մեկնաբանել` ում մեղքը որքանով է:

Քաղաքական շարժառիթներ տեսնո՞ւմ եք:

Ես չգիտեմ, ճիշտն ասած, չեմ կարող ասել: Եթե քաղաքական շարժառիթները օգտագործում են, դա վատ է: Բայց երևի մարդիկ ինչ-որ բան արել են, որի համար համապատասխան…ուրեմն…

Խոսքը Նիկոլ Փաշինյանի, Սասունի Միքայելյանի մասին է:

Դե, ես կարծում եմ` արդեն 3 տարի է` այդ մարդկանց անունները տրվում են, և ասվում է, թե ինչի համար են դատել: Ես նորից ոչ դատավոր եմ, ոչ մեկնաբանող: Դա արդեն իմ խնդիրը չի, դատական համակարգի գործ է: