Ինչքան մոտենում են համապետական ընտրությունները, այնքան ակտիվանում են այս կամ այն պաշտոններում վերադասավորումներ անելու վերաբերյալ խոսակցությունները: Մամուլում շրջանառվում են լուրեր, որ առաջիկայում պաշտոնանկ է արվելու Լոռու մարզպետ Արամ Քոչարյանը եւ այդ պաշտոնում նշանակվելու է ԱԺ պատգամավոր, ՀՀԿ խմբակցության քարտուղար Էդուարդ Շարմազանովը: «Այդ լուրը որեւէ կապ չունի իրականության հետ եւ անհեթեթություն է: Այդ լուրի պատվիրատուներին խորհուդ կտամ ավելի օգտակար բանով զբաղվեն եւ իրենց էներգիան ավելի արդյունավետ սպառեն»,- «Հետքի» հետ զրույցում ասաց Էդուարդ Շարմազանովը: Պատգամավորի ասելով` ինքը շատ գոհ ու բավարարված է իր կարգավիճակից եւ ապագան պատկերացնում է ՀՀԿ խմբակցությունում: «Ես այն քաղաքական գործիչների թվին չեմ պատկանում, որոնք առաջնորդվում են քաղաքական կապրիզներով: Առհասարակ, որեւէ պաշտոնի համար կատաղի պայքար չեմ մղել եւ որեւէ խոսակցություն էլ չկա, որ նոր պաշտոնի նշանակվեմ»,- ավելացրեց Է. Շարմազանովը: