Այսօր ԿԳՆ գիտության պետական կոմիտեում տեղի է ունեցել Springer գիտատեղեկատվական հրատարակչության հետ համագործակցության եւ Գրադարանային կոնսորցիումի գործունեության վերաբերյալ սեմինար: Սեմինարի ընթացքում կոմիտեի նախագահ Սամվել Հարությունյանը հայտարարել է, որ համաշխարհային գիտական ճանաչում ունեցող Springer հրատարակչության հետ ս.թ. նոյեմբերի 23-ին երկարատեւ բանակցությունների արդյունքում կնքվելու է անդամակցության պայմանագիր, համաձայն որի` Հայաստանի բոլոր պետական գիտական հիմնարկությունները հնարավորություն կստանան անվճար օգտվելու տվյալ հրատարակչության ծառայություններից: Սա ենթադրում է մոտ 1700 գիտական ամսագրերից եւ 5 տարի տեւողությամբ գիտական գրականությունից սեփականության իրավունքուվ օգտվելու հնարավորություն: Այդ պայմանագրի շրջանակներում ՀՀ գիտական կազմակերպությունները կկարողանան օգտվել, ինչպես նաեւ ներբեռնել Springer հրատարակչության գիտական գրականությունը՝ ստեղծելով սեփական վիտուալ էլեկտրոնային գրադարանները: Ս. Հարությունյանը նշել է, որ նմանատիպ ծառայությունները տրամադրվում են մոտավորապես 1 մլն 500 հազար ԱՄՆ դոլարով, սակայն Հայաստանին հնարավորություն է տրվել այդ ծառայություններից օգտվել՝ վճարելով միայն այդ գումարի 10 %-ը՝ 150 հազար ԱՄՆ դոլար: Springer հրատարակչության հետ աշխատանքները Հայաստանում համակարգելու է Էլեկտրոնային գրադարանների կոնսորցիումը, որը Միջազգային գրադարանային կոնսորցիումի անդամ է: Գիտական կազմակերպությունները, Էլեկտրոնային գրադարանների կոնսորցիումին անդամակցելու համար պետք է վճարեն տարեկան ընդամենը 50-60 հազար դրամ անդամավճար: Այս առումով էլ Ս. Հարությունյանն ավելացրել է, որ հետագայում գիտական հիմնարկներին կտրամադրվեն լրացուցիչ միջոցներ՝ կոնսորցիումի անդամավճարները վճարելու նպատակով: Ինչպես հայտնում են Գիտության պետական կոմիտեի տեղեկատվության եւ հասարակայնության հետ կապերի բաժնից, վերջում կոմիտեի նախագահն ավելացրել է, որ 2012 թ. նախատեսվում է որպես պետական նպատակային ծրագիր ՀՀ կառավարության հաստատմանը ներկայացնել ՀՀ-ում «Գրիդ» գրադարանային վիրտուալ ցանց ստեղծելու նախագիծ: