Նոյեմբերի 15-ին և 16-ին Երեւանում անցկացվեց «Ոստիկանական ծառայողների համար հասարակական կարգի պահպանության եւ վատ վերաբերմունք չկիրառելու մասին» թեմայով սեմինարը, որը կազմակերպել էր Եվրոպայի խորհրդի մարդու իրավունքների եւ իրավական հարցերի գլխավոր քարտուղարությունը` ՀՀ ոստիկանության հետ համատեղ: Սեմինարն անցկացվեց «Ոստիկանության գործունեության ոլորտում 2010-2011 թվականների բարեփոխումների»  ծրագրի շրջանակներում, որն ընդունվել է այս տարվա ապրիլի 1-ին` Կառավարության  որոշմամբ: Սեմինարի հարցերի շրջանակը քննարկվել էր Եվրոպայի խորհրդի հետ միասին: Հիմք էին ընդունվել վերոնշյալ ծրագրի դրույթները: Մասնավորապես. - Հասարակական կարգի եւ անվտանգության ապահովմանն ուղղված գործողությունների (այդ թվում` ֆիզիկական ուժի, հատուկ միջոցների եւ զենքի գործադրման առումով) իրականացման իրավական բազայի կատարելագործման ոլորտում միջազգային առաջավոր փորձի ուսումնասիրում, - Զանգվածային անկարգությունների կանխման ուղղությամբ միջազգային փորձի ուսումնասիրում, մասնագիտական գիտական գիտելիքների կատարելագործում, - Հասարակական կարգի պահպանման գործում հասարակայնության ներգրավմանն ուղղված միջազգային փորձի ուսումնասիրում եւ ներդրում: Սեմինարին մասնակցելու, նշված ոլորտում եվրոպական առաջավոր փորձը ներկայացնելու, ինչպես եւ երկուստեք քննարկումների նպատակով Երեւանում էին Վիլլեմյեն Լոսը` ԵԽ գլխավոր քարտուղարությունից, եւ ԵԽ փորձագետներ ՄաքՔլին Ջանիսն ու Բերթ Բուլթմանը: Սեմինարին բացման խոսքով հանդես եկան ՀՀ ոստիկանության պետի տեղակալ Արթուր Օսիկյանը, ԵԽ գլխավոր քարտուղարության ծրագրի ղեկավար  Վիլլեմյեն Լոսը և ոստիկանության շտաբի պետի տեղակալ Արմեն Ղուկասյանը: Սեմինարին մասնակցում էին ոստիկանության կենտրոնական ապարատի եւ տարածքային ստորաբաժանումների ղեկավար ծառայողներ: