ՀՀ վարչապետ Տիգրան Սարգսյանը ուսանողության միջազգային օրվա կապակցությամբ այսօր այցելել է Երևանի ճարտարապետության և շինարարության պետական համալսարան և Հայաստանի պետական ճարտարագիտական համալսարան։ Վարչապետի առաջին կանգառը ԵՊՃՇՀ էր, որտեղ մասնակցել է նորակառույց «Արվեստանոց» մասնաշենքի բացման արարողությանը։ Մասնաշենքը կառուցվել է Շինարարների, Ճարտարապետների միության անդամների ու բուհի համատեղ միջոցներով։ Շենքի կառուցման համար ծախսվել է 180 մլն դրամ, իսկ շինարարական աշխատանքները տևել են երկու տարի։ Վարչապետը շրջել է «Արվեստանոց» մասնաշենքում, որը բաղկացած է ռեկրեացիոն մասից և 3 լսարանային սրահից։ Շախմատի ակումբը անվանակոչվել է աշխարհի 9-րդ չեմպիոն Տիգրան Պետրոսյանի անվամբ։ Մասնագիտական լսարաններից մեկը անվանվել է ճանանչված ճարտարապետ, ակադեմիկոս Ջիմ Թորոսյանի անվամբ։ Այստեղ ցուցադրված են բուհի դասախոսների աշխատանքները։ Հայաստանի պետական ճարտարագիտական համալսարանի էներգետիկայի ֆակուլտետում կառավարության ղեկավարը այցելել է միջուկային անվտանգության տարածաշրջանային կենտրոն, որը գործում է մոտ 6 տարի և անընդհատ թարմացվում համակարգչային նոր ծրագրերով։ Կազմակերպվում են դասախոսություններ ու վերապատրաստման կուրսեր։ ՀՊՃՀ-ում վարչապետը մասնակցել է Ատոմային էներգետիկայի մասնագիտական համակարգչային լսարանի բացմանը, որտեղ գործում է «ՀայԱտոմի» ստեղծած ծրագիրը։ Այն նախատեսված է տեսական և գործնական պարապմունքների համար։ Այս կենտրոնի ստեղծման համար ծախսվել է շուրջ 28 հազար դոլար։ Լսարանը ստեղծվել է Ատոմային էներգետիկայի միջազգային գործակալության (ՄԱԳԱՏԷ) և USAID-ի միջոցներով։ Բուհում շրջայցի ընթացքում Տիգրան Սարգսյանը եղել է նաև էլեկտրոնային ընթերցասրահում, որը ստեղծվել է 2007թ. և նախատեսված է բուհի ուսանողների համար։ Այստեղ ուսանողները հնարավորություն ունեն օգտվել թե տեղական, թե միջազգային գրադարանային ռեսուրսներից։ Այնուհետև, ՀՊՃՀ Անդրանիկ Մարգարյանի անվան դահլիճում տեղի է ունեցել վարչապետ Տիգրան Սարգսյանի հանդիպումը Երևանի մի շարք բուհերի ուսանողների հետ։