Այս տարի մշակույթի վերաբերյալ միայն օրենքի փոփոխություններ են եղել
Տարիներ շարունակ շրջանառվում են գրադարանավարների, թատրոնի, արդեն նաեւ` կինոյի մասին օրինագծերը: ԱԺ գիտության, կրթության, մշակույթի, երիտասարդության եւ սպորտի հարցերի մշտական հանձնաժողովի նախագահ Արտակ Դավթյանը նշեց, որ թատրոնի մասին օրինագիծը առաջին ընթերցմամբ դրական է քվերակվել: Այն գտնվում է երկրորդ ընթերցման փուլում, ընդգրկված է մեծ օրակարգում:
Բանախոսը գրեթե անհնար համարեց օրինագծի քննարկումը մինչեւ տարեվերջ, քանի որ ընդամենը մնացել է մեկ քառօրյա, իսկ հարցերը շատ են:
Ինչ վերաբերում է գրադարանավարների մասին օրինագծին, ապա գիտության, կրթության, մշակույթի, երիտասարդության եւ սպորտի հարցերի մշտական հանձնաժողովը կազմակերպել է լսումներ, որի ժամանակ հնչել են առաջարկություններ, եւ Մշակույթի նախարարության հետ աշխատում են դրանց վրա:
Արտակ Դավթյանը նշեց, որ մշակույթին վերաբերող օրենքները շատ դժվարությամբ են ծնվում, ինչը բնական է, քանի որ, բանախոսի խոսքերով, մշակույթը ձեւավորվել է դարերի ընթացքում եւ իր մեջ լուրջ պահպանողականություն է կրում, փոփոխություններ անելիս էլ պետք է ձգտել չվնասել այն:
Ամբողջ տարվա ընթացքում մշակույթին վերաբերող որեւէ օրենք չի ընդունվել, 2 օրենսդրական նախաձեռնություններ են եղել պատգամավորներ Լիլիթ Գալստյանի եւ Ռուզան Առաքելյանի կողմից: Ռուզան Առաքելայնի առաջարկությունը առաջին ընթերցմամբ ընդունվել է եւ գտնվում է երկրորդ ընթերցման փուլում:
Իսկ պատգամավոր Լիլիթ Գալստյանն առաջարակել էր «Գովազդի մասին» օրենքում փոփոխություններ կատարել այն առումով, որ մշակութային հայտարարություններում պարտադիր լինեն տեղեկություններ այն մասին, թե կենդանի է լինելու կատարումը, թե ֆոնոգրամմայով (ձայնագրվածքով): Նրա առաջարկությունն ընդունվել էր, եւ դա ամբողջ տարվա ընթացքում միակ օրինագիծն էր:
Եթե գտել եք վրիպակ, ապա այն կարող եք ուղարկել մեզ՝ ընտրելով վրիպակը և սեղմելով CTRL+Enter
Մեկնաբանել