«Ադրբեջանի նախագահը ոչ այլ ինչ է, եթե ոչ դասալիք»
Այսօրվա ասուլիսին ԱԺ գիտության, կրթության, մշակույթի, երիտասարդության եւ սպորտի հարցերի մշտական հանձնաժողովի նախագահ Արտակ Դավթյանն անդրադարձավ նաեւ նախագահ Սերժ Սարգսյանի` Լիսաբոն չկատարած այցին. «Այնտեղ տեղ էր գտել տարածքային ամբողջականությունը` առանց շաղկապելու մնացած սկզբունքների հետ: Դրանով էլ պայմանավորված է Սերժ Սարգսյանի Լիսաբոն չայցելելը: Պատկերացրեք` ինչ կլիներ, եթե նախագահն այցելեր այդ վեհաժողովին, եւ Ադրբեջանի կողմից ինչպիսի շահարկումներ կլինեին»,- ասաց ՀՀԿ-ական պատգամավորը:
Այն բանից հետո, երբ նախագահ Սարգսյանը հրաժարվեց լիսաբոնյան այցից, ՆԱՏՕ-ի գլխավոր քարտուղարը հայտարարեց, որ ՆԱՏՕ-ն անելիք չունի ղարաբաղյան հարցի կարգավորման գործում: Դա, ըստ Արտակ Դավթյանի, ուղերձ էր միջազգային հանրությանը եւ Ադրբեջանին:
«Վերջին շրջանում Ադրբեջանի նախագահի հետ կապված ինտենսիվ թերապիայի միջոցառումներ են իրականացվում: Խոսքը վերաբերում է եւ զորավարժություններին, եւ նախագահի չկայացած այցին, եւ ՆԱՏՕ-ի գլխավոր քարտուղարի հայտարարությանը: Այլ կերպ լինել չէր կարող: Ադրբեջանի նախագահի նմանատիպ հայտարարությունները պայմանավորված են դասալքության բարդույթով, քանի որ Ադրբեջանի նախագահը ոչ այլ ինչ է, եթե ոչ դասալիք, ով հոխորտում եւ խոսում է ղարաբաղյան խնդիրը ռազմական ուժով լուծելու մասին, այն պարագայում, երբ առաջին պատերազմի ժամանակ ինքը չի մասնակացել ռազմական գործողություններին եւ ոչ էլ անգամ վառոդի հոտ է առել: Հետեւապես, բարդութավորված էությունն է խոսում իր մեջ»,- Իլհամ Ալիեւի հոգեվիճակն է վերլուծում ԱԺ պատգամավորը:
Արտակ Դավթյանի խոսքերով`Ադրբեջանում բարոյական հարթությունում խնդիրներ կան, քանի որ պատերազմի ժամանակ, երբ պետությունը կարիք ուներ երիտասարդ առողջ ուժի, նախագահը դասալիք եղավ:
Արտակ Դավթյանն անհնար է համարում ԵԱՀԿ գագաթնաժողովին որեւէ բեկումնային փաստաթղթի ստորագրումը. «Անհնար է հենց այն պատճառով, որ եռանախագահող երկրները բազմիցս հայտարարել են, որ իրենց համար ընդունելի կլինի ցանկացած որոշում, որը կընդունեն հակամարտող կողմերը: Իսկ հակամարտող կողմերից ամենակարեւորը` Լեռնային Ղարաբաղը, չի մասնակցում գործընթացին»: Ըստ պատգամավոր Դավթյանի` որեւէ փոփոխություն հնարավոր է միայն այն դեպքում, երբ ԼՂՀ-ն դառնա բանակցային կողմ եւ Ադրբեջանի հետ նստի բանակցային սեղանի շուրջ:
Եթե գտել եք վրիպակ, ապա այն կարող եք ուղարկել մեզ՝ ընտրելով վրիպակը և սեղմելով CTRL+Enter
Մեկնաբանել