Երեկ Բաքվի օդանավակայանում ԵԱՀԿ Մինսկի խմբի ֆրանսիացի համանախագահ Բեռնար Ֆասիեն կարևորել է Աստանայում կայանալիք ԵԱՀԿ պետությունների ղեկավարների հանդիպումը: Նա հիշեցրել է, որ միջնորդներն Ադրբեջան են ժամանել Մոսկվայից, որտեղ հանդիպել են Ռուսաստանի ԱԳ նախարար Սերգեյ Լավրովի հետ, և որ Բաքվում հանդիպելու են Ադրբեջանի նախագահի հետ ու հաջորդ օրը` արդեն այսօր, լինելու են Երևանում: «Եթե հիշում եք, անցած տարի Աթենքում միջնորդ պետությունների ղեկավարները ստորագրել են շատ բովանդակալից հայտարարություն: Այս տարի էլ ԵԱՀԿ անդամ պետությունների գագաթնաժողովն է: Այս հանդիպումը շատ կարևոր է: Այդ պատճառով պետք է դրան լրջորեն պատրաստվել»,- հայտարարել է նա: