Փոխվարչապետ, տարածքային կառավարման նախարար Արմեն Գեւորգյանն այսօր աշխատանքային խորհրդակցություն անցկացրեց Ջրօգտագործողների եւ Ջրառ ընկերությունների ղեկավարների հետ: Հանդիպմանը մասնակցում էր նաեւ ջրային տնտեսության պետական կոմիտեի նախագահ Անդրանիկ Անդրեասյանը: Խորհրդակցությանն ամփոփվեցին տարվա ընթացքում կատարված աշխատանքների արդյունքները, ինչպես նաեւ նախանշվեցին 2011թ. անելիքները: Ներկայացվեց, որ նոյեմբերի 21-ի դրությամբ մատակարարվել է 398.693 մլն լ/խմ ջուր, որի հասույթը կազմում է 4,374,039 հազար դրամ: Նոյեմբերի 21-ի դրությամբ,  նախորդ տարվա նույն ժամանակահատվածի համեմատ, հավաքագրման ցուցանիշն աճել է 345 մլն դրամով: Փոխվարչապետը հորդորեց հավաքագրման մակարդակը հասցնել Ջրային տնտեսության պետական կոմիտեի հետ համաձայնեցված ծրագրային ցուցանիշներին: Ա. Գեւորգյանը Ջրօգտագործողների ընկերությունների (ՋՕԸ) ղեկավարներից պահանջեց մինչ տարեվերջ կոնկրետ քայլեր ձեռնարկել վարձավճարների հավաքագրման ուղղությամբ: Նա հիշեցրեց, որ ՋՕԸ-ների ղեկավարների հիմնական խնդիրներն են անհրաժեշտ ջրի մատակարարման, արդյունավետ ֆինանսական վարչարարության եւ կարգապահության ապահովումը: Փոխվարչապետը նշեց նաեւ, որ ՀՀ կառավարությունը համապատասխան օրենսդրական փոփոխություններ է նախաձեռնել, եւ արդեն ԱԺ առաջին ընթերցմամբ ընդունվել է օրենսդրական փաթեթ, որը նախատեսում է ՋՕԸ-ների կողմից մատուցվող ոռոգման ծառայություններն ազատել ԱԱՀ-ից: Ներկաներին տեղեկացնելով «ՀՄՀ-Հայաստան»-ի ծրագրերի մասին` նա հորդորեց ՋՕԸ-ների ղեկավարներին պատասխանատվությամբ մոտենալ եւ աջակցել մասնավորապես երրորդ կարգի ջրամբարների եւ պոմպակայանների վերականգնման ծրագրերի իրականացման ընթացքին: Փոխվարչապետը տեղեկացրեց նաեւ, որ այս տարի «ՀՄՀ-Հայաստան»-ի  ծրագրերի շրջանակում իրականացվող ՋՕԸ-ների տեխնիկական օժանդակության եւ կարողությունների հզորացման ծրագրով մինչեւ հաջորդ ոռոգման շրջանի նախապատրաստական աշխատանքների սկիզբը ՋՕԸ-ներին նախատեսվում է նոր տեխնիկայի տրամադրում: Ա. Անդրեասյանն անդրադարձավ ՋՕԸ-ներում արդեն ներդրված GIS ծրագրին, որի միջոցով իրականացվում է ոռոգվող հողատարծքների եւ ջրի ծավալների հաշվառումն ու կառավարումը: Նշվեց, որ ծրագիրը նպաստում է ջրամատակարարման, գումարների հավաքագրման գործընթացի արդյունավետության բարձրացմանը: