Կաշառք ստանալու եւ խարդախություն կատարելու համար Դատարանը հիմնավորված է համարել «Աբովյան» ՔԿՀ-ի կանանց տեղամասի պետ Կարինե Համբարձումյանին նախաքննական մարմնի առաջադրած մեղադրանքները եւ դատապարտել 9 տարվա ազատազրկման` 8 միլիոն դրամին համարժեք գույքի բռնագրավմամբ: Ապացուցված է համարվել, որ Կարինե Համբարձումյանը պայմանավորվածություն է ձեռք բերել  քրեակատարողական հիմնարկի՝ իր ղեկավարած տեղամասի դատապարտյալ Արեւհատ Սարգսյանի հետ՝ նրան 2008թ. հոկտեմբերին ՔԿՀ-ից կարճաժամկետ մեկնում տրամադրելու հարցում: Այն է՝ Արեւհատ Սարգսյանին դրական բնութագրելու, իր պաշտոնեական լիազորությունների սահմաններում խոչընդոտներ չառաջացնելու, նրա օգտին գործողություններ կատարելու դիմաց որպես կաշառք  պահանջել եւ նույն ամսին Արեւհատ Սարգսյանի քույր Անահիտ Սարգսյանից «Աբովյան» ՔԿՀ-ում Կ. Համբարձումյանն անձամբ ստացել է 1000 ԱՄՆ դոլար կաշառք: Բացի այդ՝ Արեւհատ Սարգսյանի օգտին գործողություններ կատարելուն նպաստելու համար, դարձյալ կարճաժամկետ մեկնում տրամադրելու նպատակով, 2008թ. հոկտեմբեր-նոյեմբեր ամիսներին պահանջել եւ անձամբ նրանից ստացել է 1000 ԱՄՆ դոլար կաշառք, իսկ 2008թ. դեկտեմբեր ամսին` 1500 ԱՄՆ դոլար կաշառք: Այնուհետեւ 2009թ. պատժի հետագա կրման համար Ա. Սարգսյանին բաց տիպի ՔԿՀ ռեժիմի տեղափոխելու միջնորդությունը քրեակատարողական վարչության համապատասխան հանձնաժողովին ուղարկելու գործընթացին նպաստելու, խոչընդոտներ չառաջացնելու, նրա օգտին այլ գործողություններ կատարելուն նպաստելու դիմաց Կ. Համբարձումյանը նրանից պահանջել է առանձնապես խոշոր չափերի՝ 7500 ԱՄՆ դոլար կաշառք: Սակայն գումար չունենալու պատճառով Ա. Սարգսյանը չի կարողացել պայմանավորված օրը տալ իրենից պահանջված 7500 ԱՄՆ դոլարը՝ խոստանալով այն տալ հնարավորինս սեղմ ժամկետներում: Արդյունքում՝  Կ. Համբարձումյանը, օգտագործելով այս հանգամանքը, Ա. Սարգսյանից արդեն խաբեությամբ գումար հափշտակելու դիտավորությամբ, իր մտերիմներից որոշակի տոկոսադրույքներով  գումարներ վերցնելու պատճառաբանությամբ, պահանջված կաշառքից բացի այլ գումարներ հափշտակելու նպատակով, ենթադրյալ անձանց տոկոսներ վճարելը Ա. Սարգսյանի կողմից ուշացնելու պատրվակով, նրանից պահանջել եւ ստացել է եւս 13 300 ԱՄՆ դոլար՝ իբրեւ վերոհիշյալ 7500 ԱՄՆ դոլար գումարի տոկոսներ: Ինչպես հայտնում են գլխավոր դատախազության մամլո ծառայությունից, բացի այդ՝ Կ. Համբարձումյանը դատապարտյալ Ա. Սարգսյանին պատժի հետագա կրումից ազատելու համար փորձել է նպաստել կաշառք տվողի՝ Ա. Սարգսյանի եւ կաշառք ստացողի միջեւ կաշառքի շուրջ համաձայնության գալուն՝ Ա. Սարգսյանից պահանջելով եւ ստանալով 3000 ԱՄՆ դոլար գումար: Սակայն 2010թ. փոտրվարի 4-ին Երեւանի Չարենցի փողոցում այդ 3000 ԱՄՆ դոլարը եւ վերոհիշյալ 20 800 ԱՄՆ դոլարն ստանալու պահին բռնվել եւ բերման է ենթարկվել: