Կենդանության օրոք տպագրվելն, ըստ Շիրակի թեմի առաջնորդ Միքայել եպիսկոպոս Աջապահյանի, ամենահեշտ բանն է, եթե ունես համապատասխան գումար եւ ինչ-որ բան ես գրել: Ինքն անձամբ երբեք տպագրվելու ցանկություն չի ունեցել` համարելով, որ եթե արժեքավոր խոսք ես ասել, ապա գնահատող մարդիկ դա կհավաքեն եւ հետմահու կտպագրեն սերունդների համար: Թեմի Սոցիալ-կրթական կենտրոնում «Աստվածաշունչ եւ հասարակություն» գրքի շնորհանդեսին Սրբազան հայրը մասնակցում էր որպես հեղինակ, թեպետ գոհունակությամբ նշեց, որ իր կարծիքը տպագրիչները հաշվի են առել ու իր անունը շապիկին չեն գրել: Մարդկության եւ մարդու գիրքը` Աստվածաշունչը, եւ մերօրյա խնդիրները ներկայացնող «Աստվածաշունչ եւ հասարակություն» զրուցագրքի տպագրության նախաձեռնումը Գյումրիի Սախորովի անվան իրավապաշտպան կենտրոնինն է: «Աստվածաշունչը եւ մենք» խորագրով զրույցների շարքը գրքի վերածելու միտքը պատկանում է թեմի սոցիալ-կրթական կենտրոնի աշխատակիցներին: Գրքում արծարծված հարցերն ու գաղափարական շեշտադրումներն ուղղված են մարդկային մնայուն արժեքների պահպանմանն ու սերունդներին փոխանցմանը: «Ես իմ գրքի հետմահու գոյությանը կասկածում եմ, եւ դա լավ է: Լինում են դեպքեր, երբ գիրքն ավելի կարճ կյանք է ունենում, քան հեղինակը: Իհարկե, լինում է նաեւ հակառակը: Աստված տա, որ այս գրքի պարագայում այն լինի հակառակը,- հույս հայտնեց Միքայել եպիսկոպոս Աջապահյանը,- իրական գրքերն այն են, որ հեղինակից ավելի երկար են ապրում: Հիմա, եթե այս գիրքը սերուցք է, կմնա, եթե մրուր է, ապա կիջնի հատակը եւ ոչ ոք չի հիշի»: