«Ժառանգություն» խմբակցության անդամ Անահիտ Բախշյանը հայտարարել է, որ կուսակցությունը պարտադիր ավտոապահովագրության հետ կապված բազմաթիվ նամակներ է ստացել քաղաքացիներից եւ ծրագրում է դեկտեմբերի կեսին բողոքի ակցիա իրականացնել պարտադիր ավտոապահովագրության դեմ: Ակցիան կլինի երթ կամ հանրահավաք, որի մասին «Ժառանգությունը» կտեղեկացնի նախապես: «Այսօր այնքան էլ կարեւոր չէ, թե որ խնդիրը կարողացանք միասին լուծել, որը` ոչ, կարեւորն այն է, որ իշխանությունը զգաստանա, արթուն մնա, եւ ինքը սկսի հաշվի նստել քաղաքացիական հասարակության այն քայլերի հետ, որոնք կազդարարեն անօրինականության, իրավունք ոտնահարող, կոռուպցիայի մասին վկայող փաստերի մասին: Մենք միասին դա կարող ենք անել ամեն օր` նամանավանդ այս պահին, երբ նախագահի, վարչապետի կողմից հնչում են կոռուպցիայի դեմ պայքարի կոչեր, իսկ Վերահսկիչ պալատը հրապարակում է հաշվետվություն, որը լի է կոռուպցիայի մասին վկայություններով, որոնք փաստում են կոալիցիոն պաշտոնյաների կոռումպացվածության վերին աստիճանի վերաբերյալ: Մեր հասարակության յուրաքանչյուր օղակ պետք է նախաձեռնի այդ կոչերը կյանքի կոչելու համարձակությունը եւ բարձրաձայնի կոռուպցիոն երեւույթների ցանկացած դրսեւորման մասին: Բավական է մենք մեր մի կտոր հացը չկորցնելու մտավախությամբ շարունակենք միայն անանուն զանգերով կամ նամակներով հայտարարություններ անել այդ աղաղակող փաստերի մասին: Սրանք քայլեր են, որ իշխանություններին ստիպելու են հաշվի նստել ձեզ հետ, եւ որքան իշխանությունը ներկայացնողները հաճախ հանդիպեն ձեր կողմից դիմադրության, այնքան կզորանանք բոլորս»,- ասում է Անահիտ Բախշյանը: