Տեսանյութեր
Լուսանկարներ
Գեղարքունիքում նվազել են հարկերի հավաքագրման տեմպերը
Փոխվարչապետ, տարածքային կառավարման նախարար Արմեն Գեւորգյանի ղեկավարությամբ Գեղարքունիքի մարզպետարանում այսօր անցկացված խորհրդակցությանը ներկայացվել են մարզում տարվա ընթացքում իրականացված աշխատանքները:
Քննարկվել են համայնքների սեփական եկամուտների հավաքագրման արդյունքները, նախորդ տարիների աշխատավարձերի պարտքերի մարման ընթացքը: Արձանագրվել է, որ մարզում նվազել են հողի հարկի, տեղական տուրքերի եւ վարձակալության գումարների հավաքագրման տեմպերը: Ա. Գեւորգյանը հորդորել է քայլեր ձեռնարկել ցուցանիշները բարելավելու ուղղությամբ: Կարեւորվել է մինչեւ տարեվերջ համայնքների 2011 թ. բյուջեների ընդունումը: Փոխվարչապետը մարզպետարանի աշխատակիցներին հանձնարարել է վերահսկողություն իրականացնել բյուջեների կազմման գործընթացի նկատմամբ` նկատելով, որ նախորդ տարիներին կուտակված պարտքերը նաեւ ոչ իրատեսական բյուջեների հետեւանքով են առաջացել:
Փոխվարչապետին զեկուցվել է մարզում տարվա ընթացքում իրականացված գյուղատնտեսական աշխատանքների մասին: Նշվել, որ թեեւ նախորդ տարվա համեմատ այս տարի եղանակային անբարենպաստ պայմանների պատճառով մշակվող ցանքատարածությունների ծավալը նվազել է, սակայն գյուղատնտեսական արտադրանքը, հատկապես կարտոֆիլը, իրացվել է ավելի բարձր գնով: Միեւնույն ժամանակ այս տարի մարզում ավելի քիչ աշնանացան է կատարվել, սակայն 2011թ. նախատեսվում է կարտոֆիլի ցանքատարածությունների ավելացում: Ինչ վերաբերում է անասնաբուծության ոլորտին, ապա նախորդ տարվա ցուցանիշները պահպանվել են, իսկ կաթի մթերման գինը նախորդ տարվա նույն ժամանակահատվածի նկատմամբ բարձրացել է:
Խորհրդակցությանն անդրադարձ է եղել նաեւ Սեւանա լճի հարակից համայնքների գլխավոր հատակագծերի կազմման աշխատանքներին: Փոխվարչապետը մարզպետին հանձնարարել է համայնքի ղեկավարներին հորդորել աշխատանքները կազմակերպել համաձայն քաղաքաշինության նախարարության հետ ձեռք բերված պայմանավորվածությունների` ակնկալելով գործընթացի իրականացում արդեն հաջորդ տարվանից: Քննարկվել են նաեւ մարզի խնդիրներին վերաբերող մի շարք այլ հարցեր:
Ինչպես հայտնում են ՏԿՆ հասարակայնության հետ կապերի բաժնից, այցի շրջանակում փոխվարչապետը` բնապահպանության նախարար Ա. Հարությունյանի, նախագահին առընթեր Սեւանա լճի հիմնահարցերի հանձնաժողովի նախագահ Վլ. Մովսիսյանի, Գեղարքունիքի մարզպետ Ն. Պողոսյանի ուղեկցությամբ, Լճաշենի տարածքում ծանոթացել է նաեւ Սեւանի ափամերձ հատվածում իրականացվող անտառմաքրման աշխատանքների ընթացքին:
Եթե գտել եք վրիպակ, ապա այն կարող եք ուղարկել մեզ՝ ընտրելով վրիպակը և սեղմելով CTRL+Enter
Մեկնաբանել