«Էկոլուրը» տեղեկացնում է, որ այս օրերին Ջերմուկում ոչնչացվում են այգու ծառերը. «Ինչպես հայտնում են Ջերմուկի մեր աղբյուրները, ավելի քան 100 ծառ է հատվել: Տպավորություն է, որ վերադարձել են մութ ու ցուրտ 90-ականները: Մենք դեռ չգիտենք, ով եւ ինչու է որոշել հատել Ջերմուկը: Պարզ է մի բան, որ դա իսկական հանցագործություն է: Այգին հիմնադրվել է 50-ական թվականներին ճահիճների վրա: Այգում մոտ 200 տեսակ ծառ կա: Հսկայական ջանքեր են գործադրվել, որպեսզի 2100 մետր բարձրության վրա նման այգի աճեցնեն: Նման բարձրության վրա թթվածինը քիչ է: Այս առումով այգու նշանակությունը թերագնահատելը առողջարանային քաղաքի համար անթույլատրելի է: Ջերմուկը կորցնում է իր դեմքը, կարծում են Ջերմուկի բնակիչները: Հիշեցնում ենք, որ ապօրինի հատված ծառի համար բարձր տուգանք է նշանակված: Եթե տուգանքի չափը գերազանցում է 400 000 դրամը, ապա քրեական գործ է հարուցվում: Ակնկալում ենք, որ բնապահպանական պետական տեսչությունը կհետաքննի Ջերմուկի գործը եւ կհայտարարի արդյունքների մասին»: