Երեւանի քաղաքապետ Գագիկ Բեգլարյանի հրաժարականի պատճառը, ըստ շրջանառվող լուրերի, երկրի նախագահի աշխատակազմի աշխատակցին ծեծի ենթարկելն է: Իսկ այն, որ Բեգլարյանի մասնակցությամբ միջադեպ իրոք գրանցվել է, հաստատել է նաեւ նախագահի մամուլի քարտուղարը:

Անդրադառնալով կատարվածին` ՀՀԿ-ական պատգամավոր Կարինե Աճեմյանը նշում է, թե երկրի նախագահի գնահատականը շատ հստակ հնչեցրել է վերջինիս մամուլի խոսնակը. «Կարծում եմ, որ իրականում պետք է գնահատական տրվի այսպիսի երեւույթներին, եւ գնահատականը շատ արդարացի էր»: Հիշեցնենք` նախագահի մամուլի քարտուղարը Սերժ Սարգսյանի անունից հայտնել էր, թե «նման վարքագիծն անընդունելի է եւ անհանդուրժելի, իսկ պետական պաշտոնյայի դեպքում` առավել եւս»: «Հետքը» պատգամավոր Կ. Աճեմյանին խնդրեց մանրամասնել, թե ինչքանո՞վ էր նախագահի «գնահատականը»` փաստացի քաղաքապետի պաշտոնաթողությունը, համարժեք վերջինիս վարքագծին, արդյոք այն չի՞ ենթադրում քրեական պատասխանատվություն: «Ես չեմ կարող դրան անդրադառնալ, որովհետեւ, նախ` այնքան գիտեմ, ինչքան մամուլում հնչեցվել է, այսինքն` ավել տեղեկություն ես չունեմ, երկրորդ` դա էլ է նախագահի որոշելու հարցը»,- ասաց ՀՀԿ-ական պատգամավորն ու խնդրեց թեմային այլեւս չանրադառնալ, քանզի «ավելացնելու բան այլեւս չունի»: Կարինե Աճեմյանն իր գործընկերուհու` դաշնակցական պատգամավոր Ռուզան Առաքելյանի հետ այսօր «Հայելի» ակումբի հյուրն էր: Նրան եւս «Հետքը» խնդրեց նույն հարցին պատասխանել: «Ես կարծում եմ, որ երկրի նախագահի գնահատականը ճիշտ էր: Իհարկե, վարքագիծը տվյալ դեպքում նաեւ կարող էր իրավաբաններին հետաքրքրել: Բայց կոնկրետ քաղաքապետի պարագայումն արդեն որակավորումը տրվեց եւ ճիշտ տրվեց, մնացյալն արդեն երկրի ղեկավարի որոշումն էր` պաշտոնանկությո՞ւն, թե՞ դա թողներ իրավաբաններին»,- ասաց Ռ. Առաքելյանը: Նախագահ Սարգսյանը, սական, քաղաքապետին, ըստ էության, կանգնեցրել էր բոլորովին այլ երկընտրանքի առջեւ` կամ պաշտոնաթողություն, կամ ներողության հայցում: Այնպես որ, քաղաքապետը կարող էր մարդ ծեծելու համար ուղղակի ներողություն խնդրել, եւ վերջ: Այլ հարց է, որ ինչպես մամուլն է գրել, «Բեգլարյանը ներողություն խնդրող տղա չէ»: