Human Rights House Foundation միջազգային կազմակերպությունը ազատազրկման մեջ գտնվող լրագրող Նիկոլ Փաշինյանի վերաբերյալ նամակ է հղել Հայաստանի նախագահ Սերժ Սարգսյանին, ՀՀ Արդարադատության փոխնախարար Նիկոլայ Առուստամյանին եւ Գլխավոր դատախազ Աղվան Հովսեփյանին: Ստորեւ ներկայացնում ենք նամակը. «Human Rights House Foundation-ի անդամները լրջորեն անհանգստացած են քաղբանտարկյալ Նիկոլ Փաշինյանի վրա կատարված վերջին հարձակումներով եւ կոչ են անում Հայաստանի իշխանություններին անմիջապես ազատ արձակել նրան: Նիկոլ Փաշինյանը` 35 տարեկան, «Հայկական Ժամանակ» օրաթերթի գլխավոր խմբագիրն է եւ ընդդիմադիր Հայ Ազգային Կոնգրեսի ակտիվիստ, ով դատապարտվել է իր քաղաքական հայացքների համար: 2008 թվականի փետրվարի 19-ի նախագահական ընտրություններից հետո նա մասնակցել է ընդդիմության կողմից կազմակերպված 2008 թվականի մարտի 1-2-ի ցույցերին եւ հանրահավաքներին: Իշխանություննրը դաժանաբար ցրել են հանրահավաքները եւ օգտագործել անհամաչափ ուժ, ինչը 10 մահվան եւ ավելի քան 130 վիրավորների պատճառ է դարձել: Փաշինյանը մեղադրվել է 2008 թվականի նախագահական ընտրություններից հետո կատարված դեպքերի ժամանակ իշխանությունների դեմ բռնություն հրահրելու եւ զանգվածային անկարգությունների կազմակերպման մեջ»: