Լոռու մարզի այս տարվա վերջին մարզխորհրդի նիստում անցնող գյուղատնտեսական տարին գնահատվեց որպես խիստ անբավարար: Լոռու մարզպետարանի գյուղատնտեսության և բնապահպանության վարչության գյուղատնտեսության բաժնի պետ Վազգեն Օհանյանը նշեց, որ անբարենպաստ կլիմայական պայմանների պատճառով բոլոր գյուղատնտեսական մշակաբույսերի ցանքերը նախորդ տարվա համեմատ նվազել են 15-20%-ով: Գյուղմթերքների արտադրությունը նույնպես զիջում է 2009-ի ցուցանիշներին: 2010-ը նպաստավոր չէր նաև անասնապահության համար: Մարզի Դսեղ, Մարց, Դեբեդ, Լորուտ, Շամուտ համայնքներում խոզերի աֆրիկյան ժանտախտի հետևանքով անկվել և հարկադիր սպանդի է ենթարկվել 488 գլուխ խոզ: Տարբեր համայնքներում նկատվել են գայլերի կողմից գյուղատնտեսական կենդանիների հոշոտման դեպքեր. Սպիտակում հոշոտվել է 37, Նոր Խաչակապում` 4 գլուխ ոչխար, Ծաղկաշատում` 12 գլուխ խոշոր եղջերավոր անասուն: Հավաստիացնելով, որ հարձակումների մասին մարզի ղեկավարությունը ժամանակին ահազանգել է ոստիկանության մարզային վարչությանն ու Որսորդմիությանը` Վազգեն Օհանյանը համայնքապետներին խնդրեց «անհրաժեշտության դեպքում» աջակցել որսորդներին: Համայնքի ղեկավարներին հիշեցրին 2011թ. հունվարի 1-17-ը համայնքերում անցկացվելիք անասունների համատարած հաշվառումների մասին: Համայնքապետները ծանոթացան տարածքային կառավարման նախարարի հանձնարականին, որ մինչև հունվարի 10-ը համայնքներում աշխատող անասնաբույժները պետք է պարտադիր կնիք ունենան: Ինչպես հայտնեց Վ.Օհանյանը, 2009-ի համեմատ մարզում 1041,8 հա ավելի վարելահող է ոռոգվել: ՋՕԸ-երի կողմից ջրի ոռոգման վարձավճարների գանձումը կատարվել է 92,1%-ով: Համայնքների ջրօգտագործման պարտքերը ՋՕԸ-երին կազմում են 4797 հազ. դրամ: Խոշոր պարտքեր ունեցող համայնքներից են Գեղասարը` 530 հազար դրամ, Այրումը` 650 հազար, Օձունը` 895 հազար, Ճոճկանը` 1550 հազար դրամ: Մարզպետարանի սոցիալական վարչության պետ Վալերի Ջաղինյանն անդրադարձավ ընտանիքների անապահովության գնահատման համակարգում տեղ գտած փոփոխություններին: Մասնավորապես, առաջարկվող փոփոխությամբ ընտանիքի անապահովության միավորը որոշելիս «հարգելի բացակա անդամը» որպես ընտանիքի անդամ չի դիտվում: Իսկ որպես «հարգելի բացակա» են հաշվառվում ՀՀ-ից բացակայողները, ազատազրկման վայրում գտնվողները, զինծառայողները, ռազմաուսումնական հաստատությանում սովորողները, սոցիալական պաշտպանության հաստատություններում (մանկատուն, ծերանոց) տեղավորված քաղաքացիները: Փոփոխվել է միայնակ կենսաթոշակառուին ներկայացվող պահանջը. անձը պետք է պարտադիր միայնակ չաշխատող կենսաթոշակառու լինի, որ պետությունը նրա նկատմամբ համարժեք մոտեցում ցուցաբերի: Փոփոխություններ են կատարվել նաև ընտանեկան նպաստ և միանվագ դրամական օգնություն նշանակելու կարգերում: Ընտանեկան նպաստ կամ հրատապ օգնություն ստանալու համար տեղեկանք-հայտարարագրում քաղաքացին պետք է տվյալներ լրացնի նաև ընտանիքի կազմի և գյուղատնտեսական նշանակության հողի չափի, հողատարածքի կադաստրային եկամտի մասին: Տեղեկանքի մեջ պետք է նշում կատարի նաև անասնաբույժը` ընտանիքի տնօրինած անասնատեսակի և գլխաքանակի վերաբերյալ: Առաջարկվել է ընտանիքի համար հաշվարկված եկամտից հանել հողի հարկի կամ վարձավճարի չափը: Միաժամանակ հողի հարկից ազատված ընտանիքների համար հողօգտագործումից ստացվող եկամուտը չի հաշվարկվում հողի հարկից ազատված լինելու ժամանակահատվածում: Անասնապահությունից ստացված եկամտի հաշվարկումը դեռևս հստակեցման փուլում է: Այնինչ Լոռու մարզպետ Արամ Քոչարյանը, տարվա ամփոփումը հետաձգելով հաջորդ մարզխորհրդի նիստին, անդրադարձավ իրեն հուզող հիմնական խնդրին` համայնքների բյուջեների կատարմանը: Պարզվեց` նախորդ տարվա մակարդակն ապահովելու համար մարզում դեռ 40% սեփական եկամուտների հավաքագրում պետք է կատարվի, իսկ դրա համար համայնքի ղեկավարները միայն մի քանի օր ունեն: Սեփական եկամուտների հավաքագրման ցածր մակարդակը մարզի ղեկավարը պայմանավորեց մարզի գյուղատնտեսական վիճակով: «2010 թվականը բոլոր առումներով բավականին վատ էր: Գյուղատնտեսական առումով էլ տարին պիտի համարել ոչ բարենպաստ: Քանի որ մեր համայնքների զգալի մասը գյուղական բնակավայրերում է, այս տեսակետից մեր աշխատանքների մի զգալի մասը պայմանավորված է գյուղատնտեսությունում տիրող իրավիճակով»,- ասաց նա: Ի տարբերություն նրա` Ֆինանսների վարչության պետ Սևակ Հովհաննիսյանը սեփական եկամուտների հավաքագրման խնդիր է տեսնում հատկապես քաղաքային համայնքներում, որոնք ապահովում են մարզի սեփական եկամուտների 65%-ը: Չնայած մարզպետը գյուղատնտեսության առումով 2010-ը համարեց անբարենպաստ` այնուամենայնիվ, համոզված էր, որ համայնքապետերն առանձին հարկատեսակների գծով կարող են հավաքագրումներ անել եղած ռեսուրսների հաշվին և մինչև տարեվերջ ապահովել նախորդ տարվա ցուցանիշները: Իսկ գյուղապետերին մարզպետն իր ձևով է ճնշում: Մարզի ղեկավարը համայնքապետերին նախ դիմեց սպառնալիքով. «Մարզում եկող տարվա իրականացվելիք շատ բան պայմանավորված է մեր աշխատանքներով: Այսինքն` ինչպիսին կլինի տվյալ համայնքի սեփական եկամուտների հավաքագրման մակարդակը, այնպիսին էլ կլինի վերաբերմունքը համայնքի ղեկավարի և համայնքի նկատմամբ: Որտեղ լավ եղան աշխատանքները, այդտեղ ծրագրերը ավելի շատ ենք կատարելու. լավ չեղավ, ուրեմն մեզնից չնեղանաք»: Ապա խոսքին այլ երանգ տվեց. «Այ նայեք, հետագայում իրար երեսի ենք նայելու, ամաչելու բան չունենանք. ինչ որ խոստացել եք, մարդավարի, տղամարդավարի պետք է անեք»: Վերջում էլ մարզի ղեկավարն ավելացրեց. «Պարտադիր այս մի քանի օրվա ընթացքում աշխատում եք: Ինչ թվեր ասել ենք, պարտադիր պիտի կատարեք: 29-ին` ժամը 5-ին, նախատեսվում է տոնական միջոցառում. այս անգամ մի քիչ այլ ֆորմատ կունենա: Միայն համայնքի ղեկավարները չէ, որ մասնակից կլինեն. այլ կարգի մարդիկ էլ կլինեն այդտեղ, այլ բաներ: Նաև այնտեղ խոսակցություն կունենանք»: