Շաքի գյուղի բնակիչների համար այս տոներն ավելի թանկ կարժենան, քան նախկինում: Տարվա ընթացքում ցրտահարությունները բացասաբար անդրադարձան համայնքի գյուղատնտեսության վրա, տուժեցին բանջարաբոստանային կուլտուրաներն ու պտղատու ծառերի բերքը: Այժմ գյուղացիներն Ամանորի սեղանի համար միրգը ստիպված գնում են Սիսիանի շուկայից, ընդ որում` շատ բարձր գներով: Մինչդեռ նախորդ տարիներին Շաքի գյուղի բնակիչները մրգի վրա գումար չեն ծախսել, ավելին, իրենք են ցածր գներով խնձոր ու տանձ վաճառել: «100 դրամից ավել կգ-ը չեն վաճառել մեր գյուղացիները, իսկ այժմ նոր տարվա նախօրեին ստիպված գնում են հասնում Սիսիանի շուկա և խնձոր առնում 700-800 դրամով: Ընդհանրապես Նոր տարվա առևտուրը գյուղացիները Սիսիանից են անում. որոշ չափով էժան է գյուղի խանութից: Երթուղային տաքսով կամ անձնական մեքենայով գնում են միանգամից անհրաժեշտ մթերքը, քաղցրեղենը առնում բերում: Իսկ միսը, եթե գյուղում ապրանք մորթող է լինում, հենց գյուղից ենք առնում»,- ասում է Շաքիի գյուղապետ Վաղարշակ Առաքելյանը: Նրա խոսքերով` գյուղացիները տարվա ընթացքում գումար են տնտեսել Նոր տարին նշելու համար ու հիմա խնայած գումարով փորձում են գոնե ամենաանհրաժեշտ ապրանքները գնել: Չնայած կենցաղային հոգսերին` տարեմուտին Շաքիում չեն մոռանում տոնական տրամադրության մասին: Գյուղում ամանորի միջոցառում կկազմակերպվի, իսկ նախադպրոցական տարիքի 40 երեխայի ու դպրոց հաճախող մինչև 10 տարեկան աշակերտներին գյուղապետարանն ու բարերարները նոր տարվա նվերներ կհանձնեն: Սակայն գյուղացիներին մտահոգում է այն փաստը, որ տոներից հետո կրկին բախվելու են առօրյա կենցաղային հոգսերին, որոնք 380 տնտեսություն ունեցող գյուղում քիչ չեն: Շաքիի բնակիչների համար ամենակարևորը գյուղը ջրամատակարարմամբ ապահովելն է: Գյուղը մոտ 1.600 բնակիչ ունի: Հատկապես ջրազրկված են գյուղի վերին թաղերը: «Շատ մեծ ջրային պաշար ունենք, մենք են ջուր մատակարարում Սիսիան քաղաքին, բայց աշխարհագրական վատ դիրքի պատճառող տուժում է գյուղը: Շաքիի ջրաղբյուրի ակունքները գյուղից ներքև են գտնվում, դրա համար էլ մենք ջուր չունենք: Կոմունիստների ժամանակ աշխատել է պոմպը, տարիների ընթացքում փչացել է, քանդվել է, այսօր չկա, չի աշխատում, ինչի պատճառով գյուղի վերին թաղեր ընդհանրապես ջուր չի հասնում»,- տեղեկացնում է Վաղարշակ Առաքելյանը: Գյուղապետի խոսքերով` Շաքիի մի քանի տուն ջուր է ստանում ակունքներից: Սակայն այդ ճանապարհով շատ քիչ ջուր է հասնում, ինչը չի բավարարում կենցաղում օգտագործելու համար: «Գյուղից 3 կմ հեռու ջրաղբյուր կա, նախատեսել ենք որևէ ծրագրով ջուրը հասցնել գյուղ: Նախագծանախահաշվային աշխատանքները կազմվել են: 20 մլն դրամ է անհրաժեշտ, պետք է գտնել դոնոր կազմակերպություն: Մենք էլ ներդրում կանենք, բայց այսօր մի քանի կազմակերպությունների դիմել ենք. մերժել են: Դիմել ենք նաև գյուղնախարարությանը, սակայն պատասխանել են, որ դեռևս հնարավոր չէ աջակցել»,- ասում է Վաղարշակ Առաքելյանը: Շաքիի խնդիրներն այսքանով չեն ավարտվում: Հողագործությունն ու անասնապահությունը չեն զարգանում: Շատ հողատարածքներ անմշակ են մնում: Հացահատիկի բերքատվությունը ցածր է: Հողի հարկը դժվարությամբ է հավաքագրվում և այլն: Գյուղացիներն այստեղ ոչ լավ են ապրում, ոչ էլ վատ: Համայնքի ղեկավարի խոսքերով` գյուղից արտագաղթ դեռևս չկա: Որոշ ժամանակ առաջ երիտասարդները լքում էին գյուղը, այնուհետև արտագաղթը դադարեց: Եթե գյուղում ապրելու պայմանները չբարելավվեն, գյուղապետը չի բացառում, որ արտագաղթը կվերսկսվի: Մերի Սողոմոնյան