Ազգային վիճակագրական ծառայության հրապարակած տվյալների համաձայն, այս տարվա առաջին երեք ամիսներին Հայաստանի տնտեսությունը նախորդ տարվա նույն ժամանակահատվածի համեմատ որևէ աճ չի արձանագրել: Պարզ ասած' աճը կազմել է զրո տոկոս:

«ՉԻ» - Ամենայն հավանականությամբ' ԱՎԾ-ն սխալվել է, և տնտեսական աճի ցուցանիշը հրապարակելու փախարեն կառավարության գործունեության գնահատականն է հրապարակել:

Թե չէ այդ ինչքա՞ն պիտի վատ լինի տնտեսության վիճակը, որ փորձառու ԱՎԾ-ն չկարողանա գոնե 0.1 տոկոսանոց աճ նկարել:

Իսկ թե ինչպիսին է իրական վիճակը' կարելի է պատկերացնել հետևյալ օրինակով:

Շինարարությունն ու ծառայությունների ոլորտը, հասկանալի է, անկում են արձանագրել, բայց փորխարենը' առևտրի ոլորտում 5 տոկոսանոց աճ կա (ինչի շնորհիվ էլ հաջողվել է «զրոյի վրա կանգնել»): Խնդիրն ընդամենը այն է, որ անցած տարվա առաջին եռամսյակի համեմատ գնաճը կազմել է առնվազն 12-13 տոկոս, այսինքն' իրականում առևտրի ծավալներն էլ են շեշտակիորեն նվազել:

Իսկ դա իր հերթին նշանակում է, որ «0 տոկոսանոց աճը» խիստ լավատեսական և ուռճացված ցուցանիշ է: Իրականում տնտեսությունը նվազել է ամենաքիչը 3-4 տոկոսով: