«Հայռուսգազարդ» ընկերության գլխավոր տնօրենի պաշտոնակատար Վարդան Հարությունյանը տեղեկացրել է, որ արդեն այս տարվա առաջին եռասյակում կավարտվի Հրազդանի ՋԷԿ-ի 5-րդ էներգաբլոկի շինարարությունը, հետևաբար` հենց այսօրվանից պետք է ուսումնասիրել էլեկտրաէներգիայի արտահանման շուկաների հարցը: «ՉԻ» - Բանից պարզվում է` տասը տարի շարունակ այս իշխանությունները խոսել են Հրազդանի ՋԷԿ-ի 5-րդ էներգաբլոկի շինարարության մասին, բայց էլեկտրաէներգիայի արտահանման շուկաների հարցը նրանց սկսել է մտահոգել միայն հիմա, և նրանք որոշել են «հենց այսօրվանից» ուսումնասիրել այդ հարցը: Թարսի պես էլ այս տարվա «առաջին եռամսյակը» ավարտվում է ճիշտ և ճիշտ ապրիլի 1-ին, այսինքն` հենց այն օրը, երբ գազը թանկանալու է: Եվ ահա այդ թանկ գազով Հայաստանում պիտի էլեկտրաէներգիա արտադրվի և վաճառվի հայտնի չէ, թե ում: Պատկերացնում եք, չէ՞, ինչպես է, օրինակ, ինչ-որ ընկերություն Սահարայի անապատում բրդյա գլխարկների գործարան կառուցում, ու ինչպես է դրա տնօրենը գործարանի բացումից երկու օր առաջ հայտարարում, թե «ժամանակն է, որ մտածենք նաև մեր արտադրանքի սպառման շուկաների մասին»: Հետաքրքիր է` բա մինչ այդ ինչո՞վ էիք զբաղված: Չնայած` մեզ ի՞նչ: Ռուսներն իրենց գազով իրենց ձեռնարկությունում էլեկտրաէներգիա են արտադրում, ում ուզում են, թող վաճառեն: Մեծ հաշվով Հայաստանի հետ դա կապ չունի: