Տեսանյութեր
Լուսանկարներ
Բանկի ֆինանսավորմամբ ծրագրերի իրականացումը շարունակվում է
Այսօր Երևանի քաղաքապետ Կարեն Կարապետյանն ընդունել է վերակառուցման և զարգացման եվրոպական բանկի տարածաշրջանային տնօրեն Պոլ Անրի Ֆորեսթերին: Հանդիպման նպատակը վերակառուցման և զարգացման եվրոպական բանկի ֆինանսավորմամբ մայրաքաղաքում իրականացվող ծրագրերի ընթացքի և դրանց շարունակականության հետ կապված հարցերի քննարկումն էր:
Կ. Կարապետյանն ընդգծել է, որ քաղաքապետարանի ու վերակառուցման և զարգացման եվրոպական բանկի միջև հաստատված բոլոր ծրագրերը մայրաքաղաքում պետք է լինեն շարունակական: Պոլ Անրի Ֆորեսթերը քաղաքապետին ներկայացրել է Երևանի մետրոպոլիտենի անվտանգության ապահովման ծրագիրը, որով նախատեսվում է առաջնային կապիտալ ներդրումներ կատարել Երևանի մետրոպոլիտենի արդիականացման նպատակով:
Ծրագիրը բաղկացած է երկու փուլից, որոնցից առաջինն արդեն ընթացքի մեջ է: Կողմերը պայմանավորվել են 2011թ. սկսել նաև երկրորդ փուլով նախատեսված աշխատանքները: Ծրագրի համաձայն կնորացվի մետրոպոլիտենի շարժակազմը, կբարելավվեն ռելսային ուղիները, կվերազինվի էներգամատակարարման համակարգը, կփոխվեն պոմպերը, բացի այդ, նախատեսվում է ներդնել տեխնիկական սպասարկման միջոցներ և կառուցել դրենաժային համակարգ:
Հանդիպման ընթացքում քննարկվել են նաև ավտոկայանատեղիների վերաբերյալ քաղաքականության մշակման և Նուբարաշենի աղբավայրի թափոնակուտակման կառավարման ծրագրի հետ կապված հարցեր: Առաջիկայում վերակառուցման և զարգացման եվրոպական բանկը այս երկու ծրագրերի շուրջ կոնկրետ առաջարկություններ կներկայացնի Երևանի քաղաքապետին:
Կարեն Կարապետյանը նշել է, որ լուրջ ուշադրություն պետք է դարձվի պետություն-մասնավոր սեփականություն համագործակցությանը:
«Մայրաքաղաքում գործարարների և ներդրող օպերատորների համար պետք է տեղծվի բարենպաստ ներդրումային դաշտ: Երևանը պետք է դառնա բիզնեսի համար գրավիչ մայրաքաղաք»,- քաղաքապետարանի մամլո ծառայության փոխանցմամբ` ընդգծել է քաղաքապետ Կարապետյանը:
Եթե գտել եք վրիպակ, ապա այն կարող եք ուղարկել մեզ՝ ընտրելով վրիպակը և սեղմելով CTRL+Enter
Մեկնաբանել