Նախընտրական խոստովանություն. «Ես այդքան բառապաշար չունեմ, համ էլ մյուս թեկնածուն ավելի մեծ ծրագրեր ունի, ավելի գրագետ է»
Հունվարի 16-ին Արմավիրի մարզի Տարոնիկ գյուղում համայնքապետի հերթական ընտրություններ են: Թեկնածուները երկուսն են` գործող գյուղապետ ՀՀԿ-ական Ալբերտ Խաչատրյանը եւ անկուսակցական Գեւորգ Զաքարյանը: Ալբերտ Խաչատրյանը «Հետքի» հետ զրույցում անկեղծացավ, թե ինքը գրագետ չէ, չունի լավ բառապաշար եւ չի կարող մեր հարցերին պատասխանել:
«Մյուս թեկնածուի հետ խոսեք, ես այդքան բառապաշար չունեմ, համ էլ ինքն ավելի մեծ ծրագրեր ունի, ավելի գրագետ է»,- ասաց «Հանրապետականի» թեկնածուն:
«Եթե գրագետ չեք եւ լավ ծրագրեր չունեք, ինչու՞ եք առաջադրել ձեր թեկնածությունը» հարցին էլ Ա. Խաչատրյանը հետեւյալ պատասխանը տվեց. «Շնորհակալություն ուշադրության համար, գլուխս խառն է, ցտեսություն»: Տարոնիկի գործող գյուղապետը փորձում է համայնքապետի պաշտոնում ընտրվել երրորդ անգամ:
Նրա միակ հակառակորդ թեկնածուն` Գեւորգ Զաքարյանը, մինչ այս պահը գոհ է նախընտրական քարոզչությունից, առայժմ խոչընդոտների չի հանդիպել:
Գ. Զաքարյանի ասելով` իրեն որեւէ քաղաքական ուժ չի սատարում, սակայն հավանում է ՀՀԿ-ին: «Հնարավո՞ր է առանց որեւէ քաղաքական ուժի աջակցության հաղթել ընտրություններում» հարցին ի պատասխան` Գ. Զաքարյանն ասաց, թե ամեն ինչ էլ հնարավոր է, քանի որ Հայաստանում ենք ապրում: Նա չկարողացավ ասել, թե ինչու մինչ այս պահը ՀՀԿ անդամ չէ, սակայն չբացառեց, որ ընտրություններից հետո կանդամակցի կուսակցությանը:
«Եթե համակրում եմ, ինչո՞ւ ոչ,- ասում է համայնքապետի թեկնածուն եւ ավելացնում: -Ինձ որեւէ քաղաքական ուժ այս պահին չի սատարում, հույսս իմ համագյուղացիների վրա եմ դրել, որովհետեւ ուզում եմ գյուղի համար շատ լավ բաներ անեմ»:
Գեւորգ Զաքարյանին առաջին հերթին մտահոգում են Տարոնիկի սանիտարահիգիենիկ պայմանները: «Գյուղում որ կողմը ման ես գալիս, գետնի տակից ցայտաղբյուրներ են դուրս գալիս: Ախր ոչ մի բանը լավ չի, նայում ենք կողքի գյուղերին, վատ ենք զգում, որ այդ գյուղում ենք ապրում»,- ասում է նա:
Տարոնիկի համար լուրջ խնդիր է խմելաջրի եւ ջրահեռացման հարցը: Գյուղն ունի ոռոգման ջրի խնդիր, այդ իսկ պատճառով շուրջ 70 հեկտար հողատարածք չի մշակվում: Ջուրը հոսում է գետնի վրայով, չկան կիսախողովակներ եւ այն գյուղացիներին չի հասնում: Վթարային վիճակում է նաեւ խմելաջրի ցանցը: Գ. Զաքարյանն ասում է, որ ընտրվելու դեպքում կաշխատի փոխել ներքին ցանցը: «Եթե չկարողանամ ամբողջությամբ փոխել ցանցը, գոնե վթարները համայնքի բյուջեով հանգիստ կկարողանամ վերացնել: Շատ ծախսատար չէ: Գյուղացիները, որ իմանան իրենց համար է արվում, առանց որեւէ գումարի կգան կօգնեն: Ջրահեռացումը նույնպես անմխիթար վիճակում է, էլ ո՞րը ասեմ»,- ավելացնում է գյուղապետի թեկնածուն:
Տարոնիկն ունի 1600-ից ավելի ընտրող: Թիվ 20 ընտրատարածքային հանձնաժողովի նախագահ Գոռ Հովհաննիսյանն ասաց, որ մինչ այս պահը թեկնածուներից որեւէ դժգոհություն եւ բողոք չի ստացել: «Դե մեծ գյուղ է, ընտրական պայքար է, բայց ամեն դեպքում լարվածություն չկա»,- ավելացրեց հանձնաժողովի նախագահը:
Եթե գտել եք վրիպակ, ապա այն կարող եք ուղարկել մեզ՝ ընտրելով վրիպակը և սեղմելով CTRL+Enter
Մեկնաբանել