Այսօր Արմավիր քաղաքը նշում է իր հիմնադրման 80-ամյակը: Փողոցներում ամենուր փակցված են գունավոր պաստառներ՝ «Արմավիրը ողջունում է հյուրերին», «Ծնունդդ շնորհավոր, հոբելյար» և այլն:

Մինչ քաղաքապետը բարձրաստիճան հյուրերի ընդունելությամբ էր զբաղված, ավտոկայանում արմավիրցիները մտածում էին, թե ինչպես հասնեն Երևան: Մեկը հիվանդանոց էր շտապում, մյուսը՝ դասի, սակայն Երևան գնացող ոչ մի ավտոմեքենա երթուղի դուրս չէր եկել:

ՀԱԿ-ը մեկ շաբաթ շարունակ ամեն օր հանրահավաք է անցկացնելու, ինչը նշանակում է, որ մեկ շաբաթ մարզերից հասարակական տրանսպորտ Երևան չի գալու:

Երևան հասնելու համար պետք է օգտվել տաքսիներից: Եթե միկրոավտոբուսի ուղեվարձը 400 դրամ է, ապա տաքսին ուղևորին Երևան է հասցնում 4000 դրամով: Մարդիկ ստիպված 4 հոգով հավաքվում էին, 1000-ական դրամ հավաքում, որ դասից, աշխատանքից չուշանան:

Երթուղին սպասարկող ընկերությունը ակնհայտ խախտել է լիցենզիայի պայմանները և ողջ օրվա ընթացքում չի սպասարկել քաղաքացիներին: Տրանսպորտի և կապի նախարարությունը պետք է համապատասխան քայլեր ձեռնարկի, սակայն հաշվի առնելով, որ հանրահավաքից հանրահավաք այս գործելաոճը շարունակվում է, նախարարությունը աչք է փակում դրա վրա՝ ամեն անգամ ասելով, թե իրենք քաղաքացիներից ահազանգ չեն ստացել:

Այսօր չեն աշխատում նաև Ազգային ժողովի ՀՀԿ-ական պատգամավոր Հրանտ Գրիգորյանին պատկանող ավտոբուսներն ու միկրոավտոբուսները, որոնք սպասարկում են Էջմիածին-Երևան երթուղին: