2011թ.-ին Ինֆորմացիոն Տեխնոլոգիաների Ձեռնարկությունների Միության (ԻՏՁՄ) գործունեության առաջնահերթությունները կլինեն ՏՀՏ/ԲՏ ոլորտի զարգացումը,  ինֆորմացիոն հասարակության ձևավորումը, կրթության և աշխատուժի զարգացումը, շահերի պաշտպանությունն ու իրավական դաշտի բարելավումը, համագործակցությունը պետական մարմինների հետ: Ուշադրության կենտրոնում կլինեն նաև տեխնոլոգիկական ձեռներեցության զարգացումն ու առցանց կրթական համակարգերի ստեղծումը: Նպատակային այս համատեքստում ԻՏՁՄ-ն 2011 թվականին նախագծել է իրականացնել հետևյալ ծրագրերն ու միջոցառումները. 1.    Շահերի պաշտպանություն և իրավական դաշտ 1.    Պատրաստել և կառավարությանը ներկայացնել անհրաժեշտ օրենսդրական փոփոխությունների փաթեթ էլեկտրոնային առևտրով գործունեության ապահովման համար, մասնավորապես`

• Հարկային օրենսդրությունում

• Արժութային կարգավորման և արժութային վերահսկողության մասին ՀՀ օրենքում

• Մաքսային օրենսդրությունում

• Կնքել Կրկնակի հարկումից ազատման համաձայնագրեր գործընկեր երկրների

հետ

• ՀՀ կառավարության 25.08.1998թ. «Ծախսերը հիմնավորող փաստաթղթերի

նկատմամբ ներկայացվող պահանջները սահմանելու և այդ փաստաթղթերի կազմման կարգը հաստատելու մասին» N 525 որոշման մեջ կատարել համապատասխան փոփոխություններ` հաշվի առնելով էլեկտրոնային առևտրի առանձնահատկությունները:

• Էլեկտրոնային փողերի թողարկման նկատմամբ կիրառվող սահմանաչափերի

մեղմացում: 2.    Շահերի պաշտպանության կառույցի ստեղծում Վճարահաշվարկային ծառայություններ մատուցող ընկերությունների համար: 3.    Ներմուծված ապրանքների երաշխիքային սպասարկման խնդիր: 4.    Մաքսային վարչարարության պարզեցման խնդիր: 5.    ՏՏ ոլորտի ապրանքների արտահանման ընթացակարգերի պարզեցման  խնդիր: 6.    Կրթության ոլորտում իրականացվող ներդրումները ծախս համարելու խնդիր: 2.    Միջոցառումներ

• Digitec Expo  7-րդ ամենամյա ՏՀՏ/ԲՏ ցուցահանդես

Ցուցահանդեսի հիմնական նպատակն է ստեղծել գործարար միջավայր Տեղեկատվական և հեռահաղորդակցական /ՏՀՏ/ և բարձր տեխնոլոգիաների /ԲՏ/ ոլորտի կազմակերպությունների և պետական, գործարար ու անհատ սպառողների միջև, ներկայացնել հայաստանյան և միջազգային ՏՀՏ/ԲՏ ընկերությունների վերջին ձեռքբերումները, նպաստել հայաստանյան և միջազգային ընկերությունների միջև գործարար կապերի ընդլայնմանը: Նախատեսվում է ԴիջիԹեք 2011 ցուցահանդեսին ունենալ 100 մասնակից ընկերություն, որի 20-30 տոկոսը կլինեն միջազգային ընկերություններ, իսկ այցելուների թիվն ավելացնել 2000-ով` առնվազն 18.000 այցելու: Այս տարի ցուցահանդեսը տեղի կունենա հոկտեմբերի 7-9-ը:

• DigiTec Business 4-րդ ամենամյա ցուցահանդես-ֆորում

Ցուցահանդես-ֆորումը նվիրված է տեղեկատվական տեխնոլոգիաների կիրառմանը բիզնեսում, ներկայացվում են  ՏՀՏ լուծումներ բիզնեսի հաջող կառավարման, բիզնես պրոցեսների ավտոմատացման և ընդհանրապես բիզնեսի առօրյա խնդիրների լուծման համար: Ակնկալվում է, որ 2011թ.-ին ֆորումը կունենա շուրջ 40 ցուցադրվող ընկերություն և 1800-2000 այցելու: Ֆորումը կանցկացվի հունիսի 17-18-ը:

• IT to Business գործնական հանդիպումների շարք

ԻՏՁՄ-ն ձեռնարկում է նոր նախագիծ, որի շրջանակներում յուրաքանչյուր ամիս անց է կացվելու առաջադեմ ՏՀՏ ընկերությունների և համապատասխան ոլորտի շահագրգիռ բիզնես ձեռնարկությունների թեմատիկ հանդիպում, որի ընթացքում ՏՀՏ ընկերությունները կներկայացնեն իրենց գործնական լուծումները: Յուրաքանչյուր հանդիպում նվիրված կլինի տնտեսության որոշակի ոլորտի: Նախնական նախատեսված ոլորտներն են` շինարարություն, բժշկություն, հանքաարդյունաբերություն, ոսկերչություն, առևտուր/պահեստավորում, բանկեր/ապահովագրություն, սննդային և ոչ սննդային արդյունաբերություն, հեռահաղորդակցություն, տպագրական գործ և այլն:

• ՏՀՏ լիդերների առանց փողկապների հանդիպում-ֆորում

Ֆորումի  նպատակն է ոչ պաշտոնական մթնոլորտում պետական և մասնավոր հատվածի մասնակցությամբ քննարկել հայաստանյան ՏՀՏ/ԲՏ ոլորտի զարգացման առաջնային խնդիրները: Ֆորումում ՀՀ նախարարների մասնակցությամբ և ամփոփմամբ քննարկված հարցերը մշակվում և ներկայացվում են ՀՀ համապատասխան գերատեսչության ղեկավարությանը կամ ՀՀ վարչապետին: Ֆորումն անցկացվում է երեք ամիսը մեկ անգամ հաճախականությամբ: Այս տարի այն տեղի կունենա փետրվարի 25-27-ը, մայիսի 13-15-ը, հուլիսի 15-17-ը, սեպտեմբերի 16-18-ը, նոյեմբերի 18-20-ը:

• ՏՀՏ ոլորտի տարեմուտի տոնակատարություն և մրցանակաբաշխություն

Նախատեսվում է սույն միջոցառումն իրականացնել յուրաքանչյուր տարի: Տարեվերջին ԻՏՁՄ կողմից պարգևատրվում են ՏՀՏ ոլորտի տարբեր ասպարեզներում հաջողության հասած կազմակերպություններն ու անձինք: Նախատեսված է միջոցառումն անցկացնել դեկտեմբերի 27-ին:

• Արմռոբոտիքս

Միջոցառումն իրենից ներկայացնում է մրցույթ երիտասարդ ինժեներներից բաղկացած մի քանի թիմերի միջև, որոնք մրցում են միմյանց հետ իրենց կողմից նախագծված և պատրաստված ռոբոտների միջոցով: Նախատեսվում է այս տարի կազմակերպել 3 մրցույթ (Գծին հետևող, Իրեր տարբերակող և դասակարգող, Ական փնտրող ռոբոտներ), ինչպես նաև կհայտարարվի Անոդաչու թռչող սարքերի մրցույթի գրանցման փուլը, որի եզրափակիչ մրցույթը տեղի կունենա 2012 թվականին:

• Համակարգչային Խաղերի Նախագծման Հայաստանի Բաց Առաջնություն

ԻՏՁՄ-ն առաջին անգամ Հայաստանում  նախաձեռնում է  Համակարգչային Խաղերի Նախագծման Հայաստանի Բաց Առաջնությունը, որի նպատակն է բացահայտել նոր տաղանդներ, զարգացնել համակարգչային խաղերի նախագծման ոլորտը և դուրս գալ միջազգային շուկա:  Առաջնությունն  անց է կացվելու 2 փուլով, որի ընթացքում  մասնակիցները կներկայացնեն իրենց կողմից նախագծված համակարգչային խաղերը կամ նրանց բաղադրիչ մասերը: Մրցույթի եզրափակիչ փուլը տեղի կունենա մարտ-ապրիլ ամիսներին: ԻՏՁՄ-ն 2011 թվականին կհամակարգի և կկազմակերպի հայկական ընկերությունների մասնակցությունը հետևյալ միջազգային միջոցառումներին. CeBit  ցուցահանդեսին. համաշխարհային ՏՀՏ ցուցահանդես, որը տեղի է ունենում Գերմանիայի Հանովեր քաղաքում: Նախատեսվում է հայկական տասը  ընկերությունների մասնակցություն: CeBit-ն անցկացվելու է մարտի 1-5-ը: Ինֆորմացիոն Տեխնոլոգիաների Տարածաշրջանային Միջոցառմանը.  այն անցկացվում է Վրաստանում, նպատակն է ստեղծել  և խթանել Կենտրոնական և Արևելյան Եվրոպայի, Բալթյան երկրների, Կովկասի և Միջին Արևելքի  երկրների պետական և մասնավոր հատվածների, ասոցացիաների և ՏՀՏ ոլորտի այլ ընկերությունների միջև համագործակցությունը` նպաստելու նորարարությունն ու մրցունակությունը: Միջոցառումը տեղի կունենա հոկտեմբեր-նոյեմբեր ամիսների ընթացքում: