Լոռու մարզային ոստիկանապետ, ոստիկանության գնդապետ Անուբաղ Համբարյանը նախօրեին Վանաձորում լրագրողների հետ հանդիպմանը նշեց, թե ասուլիսի նպատակը հանրությանը ոստիկանության Լոռու մարզային վարչության և նրա ենթակա բաժինների կողմից կատարված օպերատիվ ծառայական գործունեության 2010թ.-ի արդյունքներին տեղեկացնելն է: Մարզային ոստիկանապետի տեղեկատվությունը խիստ հագեցած էր թվերով ու տոկոսներով: Անուբաղ Համբարյանն իր հաղորդած տեղեկատվության մեջ չներկայացրեց մարզում գրանցված վտանգավոր հանցագործություների ծնող պատճառներն ու դրանք կանխելու ոստիկանական միջոցառումները: Նա չանրադարձավ 2010թ.-ին Վանաձոր, Ալավերդի, Սպիտակ և մյուս քաղաքներում օրը ցերեկով, մարդաշատ վայրերում հրազենի օգտագործմամբ կատարված սպանություններին: Տեղեկատվության մեջ տեղ չէին գտել նաև մարզում տիրող օպերատիվ ներկա իրավիճակը, հանցավոր տարրերի վնասազերծումը, անչափահասների կողմից կատարվող հանցագործությունները,  ոստիկանության աշխատանքներին խոչընդոտող հանգամանքները և այլ նմանատիպ խնդիրներ: Այսուհանդերձ, Լոռու ոստիկանապետի տեղեկատվությունից պարզվեց, որ անցյալ տարի մարզում գրանցվել է հանցագործության 1229 դեպք` 2009թ.-ի 1223-ի դիմաց:  Հանցագործությունները մարզում նվազել են 6-ով: Ինչպես նախորդ տարիներին, այնպես էլ 2010-ին, մարզում հանցագործությունների առաջատարը մարզկենտրոն Վանաձորն է, որտեղ գրանցվել է հանցագործության 528 դեպք: Գրանցված առանձնապես ծանր հանցագործությունները 134-են: Աճել է թմրամոլության  ապօրինի շրջանառությունը` 40 դեպքից դառնալով 46: Գրանցված 146 մարմնական վնասվածքներից 64-ը նույնպես կատարվել է Վանաձորում: Հանցագործությունների քանակով 2-րդ տեղում է Գուգարքը` 168 հանցագործություններով, այնուհետեւ Թումանյանի տաածաշրջանն է`  Ալավերդի քաղաքով, որտեղ գրանցվել է 159, Սպիտակում` 143, Ստեփանավանում` 136, Տաշիրում` 95 հանցագործությունների դեպք: «Լոռու մարզային ոստիկանության կողմից հանցագործությունների բացահայտումը կազմում է 95 տոկոս»,- ասաց ոստիկանապետը:  Նա կարևորեց մարզում գրանված   առանձնապես ծանր 11 հանցագործությունների բացահայտումը: Լոռիում կատարվել է սպանությամբ 6 դեպք: Համբարյանը հպարտությամբ նշում է, որ 6-ն էլ բացահայտվել է: Գրանցված սպանության 1 փորձը, որը կատարվել է Վանաձորում, բացահայտված չէ և գտնվում է նախաքննության փուլում: Ըստ Համբարյանի` 100 տոկոսով բացահայտված են նաև մարզում գրանցված մարմնական ծանր վնասվածքների 146 դեպքերը: Մարզի 47 քաղաքացիներ 2010թ.-ին ինքնակամ ոստիկանությանն են հանձնել իրենց ձեռքի տակ եղած ապօրինի զենքն ու զինամթերքը. «Բայց դրա հետ մեկտեղ ոստիկանության կողմից ձեռնարկված օպերատիվ հետախուզական աշխատանքների արդյունքով հայտնաբերվել է զենքի և զենամթերքի ապօրինի օգտագործման 61 դեպք:  Բոլոր դեպքերն էլ բացահայտվել են, բացահայտումը կազմում է 100 տոկոս»,- ասաց բանախոսը: Վերջինս նաև տեղեկացրեց , որ Լոռիում, թեև թրաֆիքինգի դեպքեր չկան, սակայն հայտնաբերվել են պոռնկության 4, պոռնկությանը նպաստելու 9, թմրանյութեր տարածելու 1 դեպքեր: Բռնաբարության դեպք չի արձանագրվել, սակայն սեռական ոտնձգության 12 դեպք է գրանցվել. «12-ն էլ բացահայտված է»: Ոստիկանապետը շրջանցեց Լոռու մարզի Նեղոց համայնքում 2010թ.-ին 3 անչափահասների կողմից 11-ամյա Մ. Գ.-ի բռնաբարության փաստը, որին կասկածելի հանգամանքներում 9 օր շարունակ չէր արձագանքել ոստիկանության Թումանյանի բաժինը:  Անչափահասի բռնաբարության փաստով Ալավերդու քննչական բաժնում քրեական գործ հարուցվեց միայն «Հետքի» ահազանգից հետո, որը, սակայն, ամիսներ անց փակվեց Ալավերդու քննչական բաժնի պետ Ռուդիկ Ստեփանյանի կողմից: Նախաքննության ընթացքում 11-ամյա Մ. Գ. ուղարկվեց Վանաձորի մանկատուն, իսկ հարազատ հայրը, թողնելով երեխային` մեկնեց Ռուսաստան: Մարզում կատարված անձնական ունեցվածքի, 265 գողությունների, այդ թվում` բնակարանային 62 գողությունների փաստը, ըստ Համբարյանի, նույնպես 100 տոկոսով բացահայտված է: Նա տեղեկացրեց, որ 2010թ.-ին բացահայտվել է նաև 10 տարի առաջ Ալավերդիում Կիլինկարովների կողմից կատարված սպանությունը, եւ գործն այժմ դատարանում է. «Ակտիվ աշխատանք ենք կատարել Ռուսաստանի Դաշնության մեր գործընկերների հետ և հանցագործին տեղափոխել ենք Հայաստան»: Նա կարևորեց նաև մեծ հնչեղություն ստացած Լոռու մարզի դատախազ Ալբերտ Մկրտչյանի, Կախյանների ընտանիքի և չբացահայտված մյուս սպանությունների բացահայտումը` միաժամանակ նշելով, որ չբացահայտված 7 սպանություններից 2-ն արդեն բացահայտվել են: Արմեն Կիլիկարովի արդարացման մասին լուրերին ի պատասխան` ոստիկանապետը նկատեց. «Միայն դատարանը կարող է ասել` անձը հանցագո՞րծ է, թե՞ ոչ: Ես ասացի` առաջադրվել է մեղադրանք Կիլինկարովներին և ուղարկվել է դատարան: Մեր ունեցած օպերատիվ տեղեկությունով` Արմեն Կիլինկարովի հանցագործությունը լիովին հիմնավորված է: Դատարանը կորոշի, որից հետո ես կարող եմ ասել իմ խոսքը»: Անցյալ տարվա հոկտեմբերի 16-ին հրազենով սպանվեց ալավերդցի Ռոբերտ Մոսինյանը: Դեպքի առնչությամբ ոստիկանապետն ասաց. «Սպանությունը կատարվել է Ալավերդի քաղաքի բնակիչ Կամո Շահվերդյանի կողմից: Նրան հայտարարված է հետախուզում, առաջադրված է մեղադրանք: Իսկ մյուս կողմից խուլիգանության համար կալանավորված է 3 անձ»: Ա. Համբարյանը թեեւ հայտարարեց, որ անդրադառնալու է նաեւ ոստիկանության աշխատանքների թերություններին, սակայն նման բան այդպես էլ չարեց: