![30_06-D-Harutyunyan](https://hetq.am/wp-content/uploads/2009/06/30_06-D-Harutyunyan.jpg)
«Այո, ես գոհ եմ, բայց դա չի նշանակում, որ շատ գոհ եմ: Միշտ ասել եմ, որ եթե շատ գոհ ես, ուրեմն պետք է հրաժարվես քո պաշտոնից, որովհետև այլևս անելիք չես տեսնում»,- այսօր հրավիրված ասուլիսի ժամանակ հայտարարեց ԵԽԽՎ Հայաստանի պատվիրակության ղեկավար, պատգամավոր Դավիթ Հարությունյանը` պատասխանալով այն հարցին, թե ինքը գո՞հ է պատվիրակության անդամների աշխատանքից:
Նրա խոսքերով` պատվիրակությունը միշտ իր աշխատանքները բարելավելու տեղ ունի, և մենք չենք կարող խուսափել Եվրոպայի խորհրդում ներկայացված լինելուց:
Դավիթ Հարությունյանը ձեռքբերում է համարում այն, որ ԵԽ տնտեսական հարցերի հանձնաժողովի նախագահ է ընտրվել Հերմինե Նաղդալյանը: «Այն, որ ունեցանք հանձնաժողովի նախագահ, կարծում եմ` մեկ օրինակ է, որը որպես արդյունք տեսաք, բայց մենք ունենք շատ այլ կատարված աշխատանքներ»,-ավելացրեց պատվիրակության ղեկավարը:
Նրա կարծիքով` պատվիրակության կազմում չեն կարող լինել մարդիկ, որոնց` Եվրախորհրդի աշխատանքներին չմասնակցելուց ոչինչ չի փոխվի: Այլ բան է, որ պատվիրակությունն ունի մշտական կազմ, և այդ կազմն ավելի շատ է ներկայացված հանձնաժողովներում:
«Ճգնաժամից ելնելով` որոշ դեպքերում ստիպված ենք լինում միջոցները տնտեսելու նկատառումներով մեկնելու հիմնական կազմով: Դրանով պայմանավորված` մեր մշտական անդամները միջինում 2 անգամից ավելի շատ են ընդգրկված հանձնաժողովներում, քան լրացուցիչ անդամները: Ինչքան շատ անձ է պատվիրակությունից մասնակցում աշխատանքներին, այնքան մեր աշխատանքը տեսանելի է և արդյունավետ»,- ավելացրեց Դավիթ Հարությունյանը:
Եթե գտել եք վրիպակ, ապա այն կարող եք ուղարկել մեզ՝ ընտրելով վրիպակը և սեղմելով CTRL+Enter
Մեկնաբանել