Հաղորդում հանցագործության մասին Տեղեկանալու համար, թե ի՞նչ բարոյական վնաս է կրել «Հայկական ժամանակի» հրապարակումից հետո, որին վերջերս դատի է տվել բարոյական վնաս կրելու համար, զանգահարեցինք ԱԺ պատգամավոր Ռուբեն Հայրապետյանին: Ներկայանալուց հետո Ռուբեն Հայրապետյանն ասաց. «Էդ ի՞նչ թերթ ա, օրական ըտենց մի թերթ ա բացվում, ու որոշում եք, որ ինձ պիտի զանգե՞ք»: «Իսկ Ձեզ զանգելը արգելվա՞ծ է»,- հարցրի Ռուբեն Հայրապետյանին: «Տգետ, ես լրատվական ծառայություն ունեմ, «չերեզ» լրատվական ծառայություն իմ հետ կապնվի»,- ասաց պատգամավորը եւ անջատեց հեռախոսը: Ես, որ լուսաբանում եմ ԱԺ-ի աշխատանքները, գիտեմ, որ որեւէ պատգամավոր լրատվական ծառայություն չունի: Երբ կրկին զանգահարեցի, որպեսզի պատգամավորից ճշտեմ նման պահվածքի ու լրագրողին վիրավորելու պատճառը, Ռ. Հայրապետյանը նախ ճշտեց` արդյոք զրույցը ձայնագրում եմ, թե ոչ, իսկ երբ տեղեկացավ, որ ձայնագրվում է, սեռական բնույթի հայհոյանքներ սկսեց տալ: Վերջում էլ ավելացրեց. «Լավ արեցի»: