Տեսանյութեր
Լուսանկարներ
ՀՀ ԱԺ նախագահն ընդունել է Հունգարիայի դեսպանին
Այսօր ՀՀ Ազգային ժողովի նախագահ Հովիկ Աբրահամյանն ընդունեց ՀՀ-ում Հունգարիայի Հանրապետության դեսպան Գաբոր Շագիին: Ողջունելով դեսպանին` ԱԺ նախագահը նշեց, որ հայ եւ հունգար ժողովուրդների բարեկամությունն ու համագործակցությունը դարերի պատմություն ունեն, ինչը լավ հիմք է ստեղծում տարբեր ոլորտներում փոխշահավետ համագործակցություն համար: Նա ընդգծեց, որ հայ-հունգարական հարաբերությունները զարգացման մեծ ներուժ ունեն եւ կարեւորեց տարբեր ուղղություններով գործնական քայլեր ձեռնարկելու անհրաժեշտությունը: Հովիկ Աբրահամյանը գոհունակությամբ փաստեց, որ վերջին մի քանի տարիների ընթացքում նկատելի զարգացումներ են արձանագրվում երկկողմ հարաբերություններում, ինչին մեծապես նպաստեց 2009 թ. ՀՀ Նախագահ Սերժ Սարգսյանի Բուդապեշտ կատարած այցը: ԱԺ նախագահը վստահություն հայտնեց, որ Հայաստանը եւ Հունգարիան կարող են արդյունավետ համագործակցել ԵՄ արեւելյան գործընկերության շրջանակներում` այս համատեքստում կարեւորելով 2011 թ. առաջին կիսամյակում ԵՄ-ում Հունգարիայի նախագահությունը:
ԱԺ նախագահը կարեւորեց միջխորհրդարանական կապերի ակտիվացումը, փոխայցերը, միջազգային կառույցներում համագործակցության խորացումը:
Շնորհակալություն հայտնելով ընդունելության համար` դեսպանը բարձր գնահատեց ՀՀ Նախագահի այցը Հունգարիա եւ կարեւորեց երկկողմ կապերի հետագա զարգացումը:
Հանդիպմանը կողմերը անդրադարձան տարածաշրջանային խնդիրներին: ԱԺ նախագահը ողջունեց Հունգարիայի` Հարավային Կովկասի երկրների հանդեպ որդեգրած հավասարակշռված քաղաքականություն վարելու ուղեգիծը: Նա կարեւորեց ԼՂ հիմնախնդրի խաղաղ կարգավորմանն ուղղված ԵԱՀԿ Մինսկի խմբի գործունեությունը եւ անթույլատրելի համարեց այլ ձեւաչափեր հարցը տեղափոխելը, ինչը կարող է վտանգել խաղաղ բանակցությունների ընթացքը: Այս համատեքստում Հովիկ Աբրահամյանն իր մտահոգությունն արտահայտեց ԵԽԽՎ-ում ԼՂ հակամարտության կարգավորման հարցով ենթահանձնաժողովի աշխատանքների վերսկսման առնչությամբ, որի գործունեությունը ժամանակին դադարեցվել էր անօգտակարության պատճառով: ԱԺ նախագահի համոզմամբ ենթահանձնաժողովի գործունեությունը կխոչընդոտի Մինսկի խմբի աշխատանքներին:
Դեսպանը ողջունեց Հայաստանի ջանքերը ԼՂ հակամարտությունը խաղաղ բանակցային ճանապարհով կարգավորելու ուղղությամբ եւ ընդգծեց, որ Հունգարիան նույնպես գտնում է, որ հարցի կարգավորման միակ գործուն ձեւաչափը ԵԱՀԿ Մինսկի խումբն է:
Պարոն Շագին ՀՀ ԱԺ նախագահ Հովիկ Աբրահամյանին փոխանցեց Հունգարիա այցելելու Հունգարիայի խորհրդարանի նախագահի պաշտոնական հրավերը:
Հանդիպմանը քննարկվեցին երկկողմ հետաքրքրություն ներկայացնող այլ հարցեր եւս:
Եթե գտել եք վրիպակ, ապա այն կարող եք ուղարկել մեզ՝ ընտրելով վրիպակը և սեղմելով CTRL+Enter
Մեկնաբանել