Շաբաթ օրը «Բարգավաճ Հայաստան» կուսակցության ղեկավար կազմը հավաքվել և քննարկել է քաղաքական իրավիճակը: «Հրապարակի» տեղեկություններով` Գագիկ Ծառուկյանը բավական կոշտ որակումներով է հանդես եկել, հայտարարել է, որ ոչ մեկին չի հաջողվի իրեն դարձնել Արթուր Բաղդասարյան, ինքը «չի պառկելու» իշխանության տակ, ով համաձայն չէ, կարող է հեռանալ, և այլն: Կուսակիցները, բնականաբար, միայն հավանություն տվող շարժումներ են արել: Այս հավաքի տեսագրությունը, «Հրապարակի» տեղեկություններով, ներկայացվել է Սերժ Սարգսյանին, որը խիստ զայրացել է այս հանդգնությունից և երկուշաբթի օրը նախագահական է հրավիրել կոալիցիոն գործընկերներին, այդ թվում` Ծառուկյանին: Նախագահը վրդովված խոսել է որոշ գործընկերների պահվածքի մասին և վերջնական ժամկետ սահմանել հինգշաբթի օրը: Մինչ այդ ԲՀԿ-ն պետք է կողմնորոշվի. կամ հայտարարում է Սերժ Սարգսյանին սատարելու վերաբերյալ, կամ համագումարի ժամանակ հայտարարում է կոալիցիայից դուրս գալու մասին: