Գյումրիում վրացական պետհամարանիշներով մեքենատերերի դժգոհությունն ընդդեմ կառավարության որոշման այսօր առավոտյան քիչ էր մնում վերաճեր ոստիկանների հետ բախման: Նախորդ 2 օրերին բողոքի ակցիաները` Հայուհու հրապարակում եւ մարզպետարանի դիմաց, Գյումրի-Երեւան մայրուղու ժամանակավոր փակումը, շոշափելի արդյունքներ չէին տվել եւ երեկ մեքենատերերը որոշել էին փետրվարի 8-ին` ժամը 10-ին, հավաքվել կայարանամերձ հրապարակում, որտեղից պիտի շարժվեին Բավրա` նպատակ ունենալով փակել Հայաստան-Վրաստան միջպետական ավտոճանապարհի այդ հատվածը: Սակայն այսօր առավոտյան նշված հրապարակն արդեն իսկ շրջափակվել էր ոստիկանական ջոկատներով: Մի քանի մեքենատերեր տարվել էին ոստիկանություն: Տեսնելով, որ ակցիան ձախողվում է, ոստիկաններն էլ մտադիր չեն զիջել իրենց դիրքերը, ակցիայի մասնակիցները ուղեւորվեցին «Ասպարեզ» լրագրողների ակումբ, որտեղ այս պահին հանդիպում-քննարկում է ընթանում «Ժառանգություն» կուսակցության ներկայացուցիչների` Զարուհի Փոստանջյանի եւ Ռուբեն Հակոբյանի հետ: