Օրերս Մեծ Բրիտանիայի ԱԳՆ-ն իր պաշտոնական կայքէջում տեղադրել էր տեղեկատվություն, ըստ որի բրիտանացիներին խորհուրդ չի տրվում այցելել Լեռնային Ղարաբաղ: Այդ առթիվ Լեռնային Ղարաբաղի Հանրապետության վարչապետ Արա Հարությունյանը հայտարարել է հետևյալը. «Լեռնային Ղարաբաղի Հանրապետության գործադիր իշխանության ուշադրության կենտրոնում է գտնվում Արցախում զբոսաշրջության զարգացումը: Բարձր գնահատելով Մեծ Բրիտանիայի դիվանագիտական փորձառությունը, ինչպես նաև սեփական երկրի քաղաքացիների անվտանգության առթիվ մտահոգությունը` հարկ եմ համարում տեղեկացնել,  որ աշխարհի տարբեր երկրներից ԼՂՀ այցելողների անվտանգությունը լիովին ապահովված է: ԼՂՀ հռչակումից ի վեր հազարավոր զբոսաշրջիկներ են այցելել Արցախ, և նրանց անվտանգության հետ կապված որևէ խնդիր չի առաջացել. ԼՂՀ զինված ուժերը ապահովում են մեր հանրապետության անվտանգությունը արտաքին ագրեսիայից: Բոլոր զբոսաշրջիկներն այցելում են Արցախի Հանրապետություն Հայաստանի Հանրապետության տարածքով, այլ ոչ թե Ադրբեջանի: Կոչ ենք անում ԼՂՀ այցելել ցանկացող բոլոր անձանց լինել ԼՂՀ-ում և սեփական փորձով  համոզվել դրանում»: