Այսօր` ժամը 12:30-13:00-ի սահմաններում, ոստիկանության Արաբկիրի բաժնի աշխատակիցները Կոմիտասի 7/2 շենքի բակում տեղակայված ավտոտնակներից մեկում` «Վազ 21099» մանիշի 01 ՏԼ 026 համարանիշի ավտոմեքենայում, հայտնաբերել են երկու երիտասարդի` մահացած վիճակում: Ինչպես դեպքի վայրից հայտնում է ֆոտոլրագրող Գագիկ Շամշյանը, մահացած երկու երիտասարդներն էլ` Էդուարդ Բեգլարյանն ու Արարատ Մայիսեևը, 20 տարեկան էին: Ֆոտոլրագրող Շամշյանը փոխանցում է, որ նախնական տեղեկություններով` դիակների վրա բռնության հետքեր չկան, եւ մահվան պատճառը հնարավոր է, որ եղել է ավտոմեքենայից արտանետված շմոլ գազը: Դեպքի վայրում են ոստիկանության Արաբկիրի բաժնի աշխատակիցները` բաժնի պետ Վարուժան Ադամյանի գլխավորությամբ: Այս պահին ոստիկանության քննչական գլխավոր վարչության Արաբկիրի քննչական բաժնի քննիչները քննչական եւ փորձարարական աշխատանքներ են կատարում: Արդեն դեպքի վայր են ժամանել նաեւ դիակ տեղափոխող ավտոմեքենաները, իսկ քննիչի հանձնարարականով դատաբժիշկն իրականացնում է փորձաքննական աշխատանքներ: Լուսանկարները` Գագիկ Շամշյանի