Այսօր առավոտյան Կառավարության շենքի դիմաց հավաքվել էր բացօթյա առևտրով զբաղվող շուրջ հարյուր քաղաքացի, որոնք կրկնում էին իրենց շուրջ մեկամսյա պայքարի պահանջը` նախ ապահովել իրենց աշխատատեղերով, հետո փակել ապրուստ հայթայթելու ներկա ճանապարհը: Նրանք անչափ վրդովված էին, որ նորընտիր քաղաքապետը Երևանում կարգուկանոն հաստատելը սկսել է հասարակության ամենաթույլ և ամենախոցելի խավից: Ակցիայի մասնակիցները ՀՀ վարչապետից պահանջում էին պատասխանել շուրջ մեկ ամիս առաջ նրան ուղղված պահանջագրին, սակայն այս անգամ ևս մնալով նպատասխան` նրանք շարժվեցին դեպի Երևանում ՄԱԿ-ի գրասենյակ, որի առջև շարունակեցին բողոքի ակցիան: Ցուցարարների ձեռքին հետևյալ բովանդակությամբ պաստառներ էին. «Հայը հալածված է իր հայրենիքում», «Չենք հանդուրժելու», «Չենք ներելու մեր երեխաներին հացից զրկողներին», «Ամոթ»: Ցուցարարներն ասացին, որ շարունակելու են բողոքի գործողությունները և հաստատակամ են մնալու իրենց պայքարում: «Ժառանգություն» կուսակցության լրատվական ծառայությունը հայտնում է, որ ակցիային ներկա էին և զորակցում էին «Ժառանգություն» վարչության քարտուղար Կարինե Հակոբյանը և խորհրդարանական խմբակցության քարտուղար Լարիսա Ալավերդյանը: