ՀՀ սպորտի եւ երիտասարդության հարցերի նախարարությունում տիրող անառողջ մթնոլորտի մասին մամուլում բազմաթիվ հրապարակումներ են եղել: Նախարարությունն այդ հրապարակումների կապակցությամբ հանդես չի եկել հերքման հայրարարությամբ եւ կարծես թե անուղղակի ձեւով ընդունել է դրանք: «Մենք անլուրջ խոսակցությունները չենք մեկնաբանում: Մամուլում գրվածը ոչ մի հենք ու հիմք չունի, նախարարությունը բնականոն ձեւով աշխատում է եւ որեւէ լարվածություն չկա»,- «Հետքի» հետ զրույցում ասաց ՀՀ սպորտի եւ երիտասարդության հարցերի նախարարության տեղեկատվության եւ հասարակության հետ կապերի բաժնի պետ Իվետա Տոնոյանը: Հարցին, թե այդ խոսակցությունները որտեղից են գալիս, եթե նախարարությունում լարվածություն չկա, Ի. Տոնոյանը պատասխանեց. «Դուք ինքներդ էլ լրագրող եք եւ լավ եք հասկանում, որ կարող է ինչ-որ մեկի դրդմամբ լինի»: Հիշեցնենք, որ ըստ հրապարակումների` նախարարության աշխատակազմն այլեւս չի կարողանում աշխատել նախարար Արթուր Պետրոսյանի հետ եւ հանդուրժել վերջինիս աշխատելաոճը: Խոսվում է, որ նախարար Արթուր Պետրոսյանը չի վստահում իր  տեղակալներին եւ աշխատում է միայն իր խորհրդական Արսեն Քամալյանի հետ: