Տեսանյութեր
Լուսանկարներ
Վարչապետը վարորդների բողոքի նոտան չի ընդունել
Թե՞ գյումրեցի վարորդների հանգանակած «գումարի չափը չի հավանել»
«ՀՀ քաղաքացիները բողոք կարող են հղել թե' գրավոր տեսքով, թե' իրենց ակցիաների տեսքով երկրի իշխանություններին: Այս երթի մասնակիցները, որոնք խնդիր ունեն այսօր` մաքսազերծման հետ կապված, որը առաջացել է վերջին օրենսդրական փոփոխություններից, իրավունք ունեն իրենց պահանջը ներակայացնելու կառավարությանը: Եվ քանի որ այսօր կառավարության նիստ էր տեղի ունենալու Երեւանում եւ որտեղ քննարկվելու էր նաեւ այս խնդիրը, նրանք ցանկացել են իրենց բողոքի ձայնը նաեւ այդ տեսքով հասանելի դարձնել: Դա իրենց սահմանադրական իրավունքն է, սակայն այսօր, փաստացի մենք կարող ենք ասել, որ կառավարությունը, ի դեմս ոստիկանության պետի` Ալիկ Սարգսյանի, հանցակից է այստեղ գտնվող ոստիկաններին, որոնք շրջափակման մեջ են պահում այս ավտոմեքենաները եւ մեզ` խախտելով սահմանադրական մեր իրավունքը»,-հայտարարեց Զարուհի Փոստանջյանը Գյումրիում:
Հավաքված վարորդներին եւս մեկ անգամ հավաստիացնելով, որ վերջիններս ոչ մի ապօրինի գործողություն չեն իրականացնում, այլ ընդամենն իրենց ազատ կամքն արտահայտելու սահմանադրորեն ամրագրված իրավունքից են օգտվում` Զարուհի Փոստանջյանը, օգտվելով առիթից, ներկաների համար ընթերցեց վարչապետի աշխատակազմի ղեկավարից ստացված գրությունն ի պատասխան ակցիայի մասնակիցների նվիրատվության:
Հիշեցնենք, որ փետրվարի 10-ի Բավրայի երթի ավարտը նշանավորվեց Գյումրիի թատերական հրապարակի հավաքով: Այդ ժամանակ հանգանակություն կատարվեց վարորդների շրջանում Զարուհի Փոստանջյանի առաջարկով` «Տվեք, ով որքան կարող է» կարգախոսով:
Մանրադրամների եւ մեկ 1000 դրամանոցի հետ պարկում նաեւ մեկ բուռ արեւածաղկի սերմ էր լցվել: Այսինքն` մարդիկ այդ պահին պատրաստ էին ուղարկել կառավարություն ինչ-որ ունեին իրենց գրպաններում: Զարուհի Փոստանջյանն էլ, խոստմանը համաձայն, հանգանակության պարկը փոխանցել էր վարչապետի աշխատակազմին:
Եվ ահա ստացվել էր պատասխան Դավիթ Սարգսյանից, որ իրենք չեն կարող այդ ձեւաչափով ընդունել բողոքի նոտան, հետ են վերադարձնում հանգանակության գումարը եւ առաջարկում բաժանել հանգանակողներին:
«Այսինքն` հայտարությունը, պահանջները, որ ներկայացվում են, իրենց համար անընդունելի են,-պարզաբանեց Զարուհի Փոստանջյանը,-ձեւաչափը չի հավանել վարչապետը»:
«Կամ գուցե գումարի չափը»,-նկատեց վարորդներից մեկը:
Եթե գտել եք վրիպակ, ապա այն կարող եք ուղարկել մեզ՝ ընտրելով վրիպակը և սեղմելով CTRL+Enter
Մեկնաբանել