HY RU EN
Asset 3

Բեռնվում է ...

Էջի վերջ Այլ էջեր չկան բեռնելու համար

Որոնման արդյունքում ոչինչ չի գտնվել

Ոսկան Սարգսյան

Իսկ նախարարը փրկարարներին գերազանց է գնահատում

Վանաձոր-Վրաստանի սահման միջպետական ճանապարհի 83-րդ կիլոմետրին տեղի ունեցած սողանքի պատճառով բեռնատարները Բագրատաշենից Երեւան են մեկնում Նոյեմբերյան-Իջեւան ճանապարհով:  Փլուզման վայրից վերեւ գործում է խճապատ ճանապարհ: Այն թեւե  հարթ չէ, սակայն երթեւեկելի է: Այդ ճանապարհով է անցնում նաեւ Վանաձոր-Նոյեմբերյան միջքաղաքային երթուղու «ՊԱԶ» ավտոբուսը:

Իսկ փլուզման վայրում  աշխատանքները շարունակվում են: Դրանք քիչ արդյունավետ են, քանզի գրեթե անհնար է 250 մ երկարությամբ տարածքում, հողի հաստ շերտի տակ գտնել  5 անհետ  կորածներին:  Հոկտեմբերի 4-ին գտնվել էր անհետ կորած,  Արճիսի բնակիչ Նորիկ Միրզոյանին պատկանող «Վազ-2106» ավտոմեքենան: Այն ջարդված էր, հողի մեջ խրված  եւ հողով լցված: Բոլոր փորձերը` «Ժիգուլին» կռունկ «ՄԱԶ»-ի միջոցով հանելու, ապարդյուն անցան:

Որքան էլ  կռունկը ճոպանով ձգում էր, միեւնույնն է` վերեւից հողի շերտն ավելի էր ճնշում: Անհետ կորած Նորիկ Միրզոյանի հեռախոսը գտնվել է նրա մեքենայի մեջ, սակայն դրսի հեռախոսազանգերին  այն չէր արձագանքում, անհասանելի էր: Դեպքի վայրում էին Նորիկ  Միրզոյանի հարազատները`  եղբայրն ու որդին:   Փլուզման գոտում էին նաեւ անհետ կորած Մեխակ եւ Արթուր  Սորսումատյանների բարեկամները: Մեխակի  քրոջ ամուսինը դժգոհեց, որ որոնողական աշխատանքները շատ դանդաղ են կատարվում:

«Գնալու եմ արտակարգ իրավիճակների նախարարության շենքի առաջ, ի նշան բողոքի, նստեմ»,-ասաց  Մեխակ Սորսումատյանի փեսան, ով հրաժարվեց հայտնել իր անունը:

Փլուզման վայրում աշխատում էր մոտ 80 փրկարար Տավուշի, Արագածոտնի եւ Գեղարքունիքի մարզերից: Սակայն բահերով հող հեռացնելու նրանց գործը քիչ արդյունավետ էր: Իսկ փլուզման գոտու մյուս եզրին` Դեբեդի կամրջին երկաթուղայինները կարգի էին բերում Այրումի պահածոների գործարան ձգվող երկաթգծի ճյուղավորումը, որպեսզի երկաթուղու միջոցով հատուկ տեխնիկան  մոտենա սողանքի վայր:

Ժամը 15-ի դրությամբ աղետի վայր ժամանեց արտակարգ իրավիճակների նախարար Արմեն Երիցյանը: Քիչ անց հայտնվեց ռազմական ուղղաթիռը, որը փլուզման վայրից, գետնի երեսին գտնվող  քիչ տուժած մարդատար մեքենան օդով տարհանեց անվտանգ վայր: Նախարար Երիցյանին հարցի, թե արդյոք իր նախարարության աշխատակիցները թերացում չունե՞ն, որ սեպտեմբերի 30-ի փլուզումից հետո 2 օր անց նույն վայրում նոր փլուզում է եղել, եւ ո՞վ ղեկավարել փլուզման համար ազդակ հանդիսացած կոնտեյների հանումը, որի պատճառով եղել է մեքենաների  կուտակում, եւ ինչպե՞ս է ինքը  գնահատում  փրկարարների աշխատանքը:

Նախարարն ասաց, որ սեպտեմբերի 30-ի փոքր սողանքի մասին իրենք տեղյակ են եղել, որ այդ սողանքային գոտին իրենց կողմից  հաշվառված էր, իսկ կոնտեյների ձորից հանելու գործողության ժամանակ ամեն ծառայություն իր գործն է արել: Նախարարը տեղյակ չէր, թե ով էր բերել կոնտեյները հանելու համար  բեռնատար կռունկը:

Արմեն Երիցյանը փրկարարների աշխատանքը գերազանց գնահատեց: Սակայն 5 անհետ կորածներին կենդանի գտնելը հրաշք կարող էլինել:  Փլուզման տարածքը մաքրելու, ճանապարհը վերստին բանուկ դարձնելու համար ամիսներ կպահանջվեն: 

Մեկնաբանություններ (2)

Գոհար Արշակյան, զինվորի մայր
Ավելի շատ մեքենաներ դուրս կբերվեին, եթե ժամանակին` գոնե հաջորդ օրը առավոտյան գործի դրվեին ուղղաթիռները, նախնադարյան տեխնիկայով` բահերով փրկարարություն անհնար էր իրականացնել. այո, փլուզումը շարունակվում էր, ռիսկի գործոնը մեծ էր, փրկարարներն աշխատում էին գերլարված, ի տարբերություն նրանց ղեկավարների, որոնք հայտնվել էին աղետի վայրում տեսախցիկների առջև, առանց բահերի, կարծես իրենց ցուցադրելու համար...Լանջի անկայունության մեջ ավելի մեծ է մարդկային գործոնի դերը, քան տեղումների... սրան էլ գումարվում են ծանր ֆուռերի դերը, չնայած դրանք իրենց քաշերին համապատասխան մաքս են վճարում սահմանագլխին, այդուհանդերձ, մեր անբարեկարգ ճանապարհների պատճառով հաճախ են վտանգվում ու վարորդները կյանքով են վճարում...
GAGIK A.
VERJAPES MI NAXARAR KA VOR@ GORCOV E ZBAXVUM I TARBERUTUN MNACACI..............

Մեկնաբանել

Լատինատառ հայերենով գրված մեկնաբանությունները չեն հրապարակվի խմբագրության կողմից։
Եթե գտել եք վրիպակ, ապա այն կարող եք ուղարկել մեզ՝ ընտրելով վրիպակը և սեղմելով CTRL+Enter