Երևանի քաղաքապետ Կարեն Կարապետյանը և  «ԻՏԵՐԱ» միջազգային կորպորացիայի նախագահ Իգոր Մակարովը hամաձայնագիր են ստորագրել Երևանի քաղաքապետարանի և  «ԻՏԵՐԱ» միջազգային կորպորացիայի միջև համագործակցության վերաբերյալ։ Շնորհակալություն հայտնելով հյուրերին համագործակցության առաջարկն ընդունելու համար, Կարեն Կարապետյանը նշել է, որ այս համաձայնագիրը փոխշահավետ գործակցության նոր սկիզբ է դնում. «Մեր համոզմամբ մայրաքաղաքում ներդրումային դաշտը բավական մեծ է:  Կան ոլորտներ, որտեղ  կարելի է իսկապես շահավետ ներդրումներ  կատարել»,-ասել է քաղաքապետը: «Մեզ համար մեծ պատիվ է Երևանում գտնվել  ու ներդրումներ կատարել քաղաքի զարգացման գործում»,- ընդգծել է Ի. Մակարովը: «ԻՏԵՐԱ»-ն, որի կազմում ընդգրկված են  156 ընկերություններ, այսօր բազմակողմ ծրագրեր  է իրականացնում աշխարհի 24 երկրներում` քաղաքաշինական,  քաղաքային ենթակառուցվածքների, բնակելի թաղամասերի,  շենքային համալիրների ու  էլեկտրակայանների շինարարության ասպարեզում: Գնահատելով փոխադարձ հետաքրքրություն ներկայացնող ներդրումային առաջարկը` Ի. Մակարովը նշել է, որ այն երկարաժամկետ ու հեռանկարային  համագործակցություն է խոստանում: Որոշակի փոփոխություններ են ակնկալվում  նաև մայրաքաղաքի սպորտային կյանքում: Որպես  ՌԴ հեծանվային սպորտի ֆեդերացիայի նախագահ և նույն մարզաձևի միջազգային ֆեդերացիայի փոխնախագահ, Ի. Մակարովը և Կ. Կարապետյանը  այցելել են  կառուցվող նոր հեծանվահրապարակ,  քննարկել  են միջոցառումների ծրագիր, որը հնարավորություն կտա  այս ոլորտում  միջազգային բարձր կարգ ապահովել և համաշխարհային մակարդակի մրցումներ անցկացնել: Ըստ ստորագրված համաձայնագրի, «ԻՏԵՐԱՆ»  պարտավորվում է 2011–2016թթ. մայրաքաղաքում ներդրումային խոշոր ծրագրեր իրականացնել զբոսաշրջության, առևտրի և հանրային սպասարկման, այգիների, կանաչ տարածքների զարգացման և միշարք այլ ոլորտներում։ Մասնավորապես նախատեսվում է մինչև 2016թ. մայրաքաղաքում կառուցել նոր բազմաֆունկցիոնալ կենտրոն և միջազգային չափանիշներին  համապատասխան բարձրակարգ հյուրանոց։ «ԻՏԵՐԱՆ» կիրականացնի նաև «Նոյլենդ» («Նոյի գյուղ») զբոսաշրջային համալիրի կառուցումն ու մի շարք այլ նախագծեր։ Երևանի քաղաքապետարանը, ըստ համաձայնագրի, ՀՀ օրենսդրության շրջանակներում և սահմանած կարգով, պարտավորվում է ըստ ամենայնի օժանդակել մայրաքաղաքում կորպորացիայի ներդրումային ծրագրերի իրականացմանը՝ մատուցելով խորհրդատվական, տեղեկատվական և անհրաժեշտ այլ ծառայություններ։ Ծրագրերի ժամկետների վերջնական ժամանակացույցը կհստակեցվի առաջիկայում` բիզնես պլանների հաստատումից հետո։ Այս մասին հայտնում է Երևանի քաղաքապետարանի տեղեկատվության և հասարակայնության հետ կապերի վարչությունը: