Արդյունաբերողների եւ գործարարների միության գործադիր տնօրեն Գագիկ Մակարյանը հայտարարել է, թե շաքարավազը Հայաստանում դեռ անցյալ տարի պիտի թանկանար, բայց չի թանկացել ներկրողների «բարի կամքի» շնորհիվ: «ՉԻ»- Մեր ջերմ ողջույնները պատգամավոր Սամվել Ալեքսանյանին: Կարծում ենք` ժամանակն է նրան ՄԱԿ-ի «Բարի կամքի դեսպանի» կոչում շնորհել, ծննդավայրում կանգնեցնել արձանը, իսկ բարձր դասարանների աշակերտներին հանձնարարել շարադրություն գրել «Բարի կամքի ասպետը» թեմայով: Բա իհարկե. փաստորեն մարդը անցած տարվանից սկսած վնասով է աշխատել, շաքարավազը թանկ գնով ներկրել է, էժան վաճառել, համապատասխանաբար` իր գրպանից հարկեր վճարել, եւ այդպես շարունակ: Իսկ ահա տնտեսական մրցակցության պաշտպանության հանձնաժողով կոչվող անաղուհաց կառույցը չարամտորեն սպառնում է վարույթ հարուցել նրա նկատմամբ: Հուսով ենք` երախտապարտ հայ ժողովուրդը մեկ մարդու նման ոտքի կկանգնի եւ կպաշտպանի անսահման բարություն ճառագող իր զավակին: Բարությունն ազգային արժեք է, եւ այն պետք է փայփայել: