Մրցունակության և կանոնակարգիչ բարեփոխումների թեման է քննարկվել Երևանի քաղաքապետ Կարեն Կարապետյանի և ԵԱՀԿ երևանյան գրասենյակի ղեկավար, դեսպան Սերգեյ Կապինոսի,  «Ջեյքոբս ընդ ասոշիեյթս» խորհրդատվական ընկերության գործադիր տնօրեն Սքոթ Ջեյքոբսի հետ հանդիպման ընթացքում: Շնորհակալություն հայտնելով ընդունելության համար` ԵԱՀԿ երևանյան գրասենյակի ղեկավարն ընդգծել է «Ջեյքոբս ընդ Ասոշիեյթս» խորհրդատվական ընկերության  բարձր վարկանիշն ու միջազգային հարուստ փորձը  օրենսդրական կանոնակարգերի բարեփոխման  ասպարեզում` ավելացնելով, որ ընկերության ծառայությունները կարող են օգտակար լինել մայրաքաղաքի կառավարման ոլորտում։ Խոսելով քաղաքային տնտեսության և գործարար  հատվածի միջև համագործակցության արդյունավետ  մոդելի ձևավորման շուրջ,  Կարեն Կարապետյանը նշել է, որ այսօր քաղաքապետարանի աշխատակազմի թիվ մեկ խնդիրը  բիզնես միջավայրի համար բարենպաստ պայմանների ապահովումն է ու  ներդրումների ներգրավումը: Այդ դաշտում ընթացակարգերը պարզեցնելու և կոռուպցիոն ռիսկերը նվազագույնի հասցնելու համար քաղաքապետը կարևոր է համարել իրավական ակտերի  ու կանոնակարգերի  բարեփոխման անհրաժեշտությունը` ակնկալելով  ընկերության խորհրդատվական աջակցությունը։ «Ջեյքոբս ընդ ասոշիեյթս» –ի գործադիր տնօրենը քաղաքապետին համառոտ ներկայացրել է ընկերության աշխատանքի փորձը գոյություն ունեցող կանոնակարգերի մաքրման, ներդրումների տեսանկյունից բարենպաստ նոր կանոնակարգերի ստեղծման գործընթացի հստակեցման ու որակի վերահսկման ուղղությամբ: Նրա խոսքով, ընկերության կողմից  մշակված Կանոնակարգման ազդեցության գնահատում (ԿԱԳ) և կանոնակարգիչ գիլյոտին ծրագրերը  բարեփոխումների ժամանակակից գործիքներ են։ Որպես կայուն բարելավման գործուն մեխանիզմներ,  հաջողությամբ ներդրվել են  մի շարք երկրներում և էական ազդեցություն են ունեցել  բիզնես միջավայրի զարգացման վրա: Կողմերը պայմանավորվածություն են ձեռք բերել համատեղ աշխատանքային խումբ ստեղծելու  և առաջարկությունների առաջին փաթեթը ներկայացնելու վերաբերյալ: